Reverendis in Christo patribus, dominis et confratribus nostris karissimis, domino Cholomanno preposito, totique Conventui canon. reg. ecclesie neunburgensis ord. s. Aug. pataviens. diocesis frater hainricus prior totusque conventus domus vallis omnium sanctorum in Mavrbach ordinis Karthusiensis prefateque Pataviensis diocesis cum fidelibus oracionibus salutem et pacem eternam. Sicut longe retroactis temporibus complacuit reverenciis vestris, vt preter commune, quo omnibus tenemur, debitum karitatis, singulariores familiaritatis ac sancte amicicie et confraternitatis iniremus fedus, obtenta prius licencia a nostro generali capitulo super eodem, hoc quod voluistis et personaliter apud nos petistis, presentibus literis concedimus et ratificamus, Recipientes videlicet vos vniversos et singulos tam presentes, quam vobis in posterum succedentes in nostram confraternitatem iuxta vestre peticionis affectum, libentique ac liberali animo pie vobis impercientes in vita et in morte, quitquit per nos et successores nostros spiritualium ac piorum operum operari dignabitur clemencia salvatoris, et specialiter iuxta tenorem, ut subsequitur. In primis prout hactenus fecimus, deo dante amodo faciemus, dominicis scilicet diebus in nostro capitulo publice pro vobis vivis orabimus, ac preterea cum vnius vestrum obitus, quem Deus felicem faciat, nobis fuerit intimatus, persolvemus pro eo in conventu nostro officium defunctorum, scilicet vesperas, quod placebo dicitur, cum nocturnis et novem leccionibus et laudibus et missam insuper cantabimus pro ipso in conventu. In quorum confirmacionem et testimonium evidens damus vobis has literas nostri pendentis sigilli munimine roboratas. Que data est Maurbaci die Invencionis sancte Crucis Anno dni. Millesimo Trecentesimo Nonagesimo secundo.

Source Fulltext: ZEIBIG, Klosterneuburg (=FRA II/28, Wien 1868) S. 64-65