Nos Johannes permissione divina prepositus, Totusque Conventus Monasterii sancte Marie in Augea Trident. Dyoc. publice tenore presencium profitemur, Cum bonum sit pariter et Jocundum, fratres in vnum, hoc est, vnanimes in domo domini habitare et alter alterius onera mutuo supportare, vt lex Jhesu cristi fideliter impleatur, Hinc est igitur, quod ob devotas oraciones fratrum legis dei subditos ad amplitudinem ecclesie ac laudem et gloriam nominis dei propter commune bonum ordinis nostri indissolubilem et specialem fraternitatis vnionem in vinculo perpetue caritatis inter nos et inter Ecclesiam Newnburgensem Patav. dioc. ordinis nostri videlicet s. Aug. Can. Reg. statuimus firmiter et sanximus, Et ob hoc volumus et humiliter in dno. profitemur, vt fratres nostri predicte Ecclesie sint participes vigiliarum, Elemosinarum, oracionum, Missarum et omnium bonorum operum, que pro vivis et defunctis sollicitudine non pigra in nostro Monasterio ac ecclesia pie conpassivo animo operamur. Cum autem vnus confratrum nostrorum Monasterii seu Ecclesie prelibate propter defectum sui Monasterii minorandum aut ex aliis manifestis et racionabilibus causis cum literis sui prelati ad nostrum Monasterium venerit destinatus, Nos ipsum in nostro Monasterio tamquam vnum de confratribus nostris reverenter tenebimus providentes eidem tam in victu quam vestitu decenter vsque ad tempus in eisdem literis prefinitum. Preterea cum obitus alicuius predictorum fratrum nobis fuerit intimatus, nos sine omni dilacione exequias ipsius mortui absentis velut presentis cum Missarum et vigiliarum solempnitate consweta fideliter et devote, sicut vnius de nostro gremio peragemus, Quia sicut in vivis sic et in mortuis est fraterne karitatis efficacia observanda. Insuper dies deposicionis sue aput nos annis singulis cum digna memoria inscriptus et publicatus, velud aliorum nostrorum confratrum mortuorum in omnibus peragetur. Vt ergo hec omnia supradicta nobis vicissitudine debita rependantur, Qua propter ob maioris certitudinis firmitatem a presentibus et posteris inviolabiliter observandam cum omnibus solitis consuetudinibus nostro nostrique Conventus sigillis fecimus presentem paginam seu instrumentum testimonio roborari, Ne aliquando oblivionis vicio sancta et salubris institucio nunc et in posterum, a presentibus et posteris aliquo modo violetur. Acta sunt hec aput Monasterium sancte Marie in Awgea prope bozanum supranominatum. Anno dni. Millesimo Trecentesimo Nonagesimo secundo Sexta die mensis Junii.

Source Fulltext: ZEIBIG, Klosterneuburg (=FRA II/28, Wien 1868) S. 65-66