Bonifacius episcopus servus servorum dei. Dilecto filio Petro Preposito Monasterii Nelburgensis per prepositum soliti gubernari ord. s. Aug. Patav. dioc. Salutem et apostolicam benediccionem. Romani pontificis providencia circumspecta ad id vigilanter intendit, ne delinquentium excessus remaneant impuniti et personis ecclesiasticis presertim sub religionis habitu domino famulantibus via aperiatur delinquendi. Sane peticio pro parte tua nobis nuper exhibita continebat, quod licet punitio et correctio quorumcunque excessuum, qui per Canonicos Monasterii Nelburgensis per prepositum soliti gubernari ord. s. Aug. Patav. dioc. pro tempore committuntur, ad prepositum dicti Monasterii pro tempore existentem etiam de antiqua et approbata ac hactenus pacifice observata consuetudine pertineant, tamen nonnulli Canonici dicti Monasterii a semitis justicie deviantes, tuis monitionibus , correctionibus et mandatis in hiis presertim, quod eos vt communiter in eadem mensa vivant monuisti et alias laudabiles consuetudines dicti Monasterii servent, in regularis discipline contemptum contravenire non verentur in animarum suarum periculum. regularis observancie diminutionem prefati Monasterii detrimentum et scandalum plurimorum Quare pro parte tua nobis fuit humiliter supplicatum, ut super hoc de salubri remedio providere de benignitate apostolica dignaremur. Nos itaque huiusmodi supplicationibus inclinati, ut tam tu, quam successores tui dicti Monasterii qui erunt pro tempore, quoscunque Canonicos ut in eadem mensa communiter vivant ipsosque et alios subditos dicti monasterii quoscunque super quibuscunque criminibus, excessibus et delictis per eos vel eorum aliquos committendis iuxta delicti meritum punire, ipsosque Canonicos et subditos pro commissis iuxta iuris exigenciam corrigere, ac in eos censuram ecclesiasticam et alia iuris remedia exercere libere et licite valeas, tibi et successoribus ipsis auctoritate apostolica tenore presentium indulgemus, Constitutionibus apostolicis, statutis et consuetudinibus Monasterii et ordinis predictorum ac aliis contrariis non obstantibus quibuscunque. Nulli ergo omnino hominum liceat hanc paginam nostre concessionis infringere vel ei ausu temerario contraire. Si quis autem hoc attemptare presumpserit, indignationem omnipotentis Dei et beatorum Petri et Pauli apostolorum eius se noverit incursurum. Dat. Rome apud Sanctum petrum IIII Kal. Aprilis Pontificatus nostri anno Nono. Ja. de Fulgineo.

Source Fulltext: ZEIBIG, Klosterneuburg (=FRA II/28, Wien 1868) S. 90-91