Ich Rvdolf von Walssee Bechenn - vmb die Mul, genant die Pawngarten Mul gelegen ze Rorbach vnder dem Greitschenstain vnd auch die hofstat oberhalben derselben Mul gelegen, da vormals ein halbs lehen gewesen ist, mit sambt dem Pawngarten, der daran Sto^esset vnd ayns vnd zwainczich Jeuch akchers vnd ein tagwerch wismadt vnd ettwevil velber, das alles dar zu gehoret vnd das meiner lehenschaft zu Assparn gewesen ist, das Andre der Mulner vormals hat inne gehabt, vnd mir von verhandlung wegen ledig ist warden, hab ich angesehn die trewn dienst, die mir mein dyener lentz von Agstain lang zeit getan hat, vnd noch hinfu^er desterpas getun mag, vnd han demselben lenczen vnd Kunigunden seiner hawsfrawen, des obgenanten Mulner tochter vnd allen iren erben diselben mul, hofstat, paungarten. ayns vnd zwainzich Jeuch akchers, wismad vnd velber mit aller irer zugehorung - zu rechtem Purchrecht - geben vnd gelassen - Doch also, das sy - zwen vnd dreissich wienner phennig, die zu der zeit gib vnd geb sind, - zu der newn kapellen ze Asparn Sand Thomas des heiligen zwelfpoten Jerlich zu Sand Michels tag zu rechtem purchrecht davon dienen vnd raichen sullen. Mit vrchund ditz briefs versigelt mit meinem anhangunden Insigel. Geben ze Wienn - an sand Dorothee tag der heiligen Junkchfrawen - drewtzehenhundert Jar, darnach in dem Siben vnd newnczigistem Jar.

Source Fulltext: ZEIBIG, Klosterneuburg (=FRA II/28, Wien 1868) S. 89-90