Notum sit omnibus ecclesie fidelibus tam presentibus quam et futuris utriusque sexus, qualiter matrona quedam nobilis Alheidis nomine uidua Ernstonis eque nobilis uiri de Hohenburch et Friderici Ratisponensis aduocati filia tradiderit sue proprietatis siluam Prvmste vvlgariter dictam iuxta riuum Witen sitam quantitate xx. mansorum per manus filiorum suorum Ernustes et Friderici ipsis annuentibus et tradentibus altario Saluatoris mundi et sancti Agapiti martiris ad locum, qui dicitur Chremsemonasterium Udalrico eiusdem loci abbate presente et suscipiente ob remedium anime sue et mariti sui Ernstonis et patris sui Friderici, cuius speciali donacione hoc idem possederat predium et matris sue Livtkardis et filiorum suorum et omnium parentum suorum ea scilicet racione, ut ecclesia ibidem edificanda nullatenus deinceps dei seruicio sit frustranda. Vt uero hoc firmius a presentibus recipiatur et a posteris cercius credatur sibi testibus teutonico more per aurem tractis est confirmatum, sicque fidelibus conseruatum. Horum nomina hic sunt subscripta: Hertuuicus de franchenrvt, Engelschalch de Dahebach, Dietmar de Stregen, Pilgrim de Wiltperch et frater eius Adalbreht de Slate, Ortolf de Fvrwald, Ortolf de Prvnn, Hertwich de Svlze, Wipoto de Chrotendorf, Hartlieb de Tvrivgenrot, Chvnrat de Hvsen. (Chrismon.) Facta est autem huiusmodi tradicio temporibus pie memorie Reginberti Patauiensis ecclesie episcopi, qui eciam ecclesiam constructam adueniens sollempniter sepedicta domina Adelheide presente consecrauit eiusque peticione anteactam tradicionem banno suo legittime confirmauit. (Chrismon.) Facta est eciam in diebus diue memorie Livpoldi rnarchionis, quod ipse quodam tempore illo adueniens locum conspexit, laudauit suoque iure confirmauit solitaque sibi liberalitate tantundem silue ultra predictum fluuiolum tribuendo augmentauit.

Source Fulltext: OÖUB 2 (Wien 1856) S. 722-723