IN nomine Sanctae et individuae Trinitatis et unius perfectaeque Deitatis. Ego Odoakarus tertius Dei gratia Styrensis Marchio et Advocatus sancti Salvatoris mundi sanctique Agapiti Martyris in Chremesemonasterio cunctis in Christo renatis justitiae adhaerere semitis et a rege justorum praemio remunerari perennitatis. Divinis et humanis legibus, qui super homines principantur, ad discendum verum et justum instruuntur, ne ignari hujusmodi disciplina inveniantur. Hanc aequitatis normam ego Odoakarus Marchio Styrensis tertius considerans plurima in Advocatia mea Chremesmunster abusiva inveni, quae dolens adolescentiae meae temporibus nata respectu Dei precibusque et lacrymis devictus Abbatis Udalrici Fratrumque ejusdem loci summo conamine extirpare radicitus sunt disposita. Siquidem subadvocati mei usurpaverunt sibi jura nimis dura, quae sub examinatione meorum fidelium discussa, eorum sententia penitus adnullata sunt et evacuata. Hinc ego coactus quasi nova statuere jura, dum antiqua postposita sint ut inveterata, ad honorem Dei et salutem animae meae et pij patris aliorumque parentum meorum scripto et sigillo meo restauravi et deinceps praecipio eadem conservari. Sunt autem haec jura advocatiae: Tria placita annuatim, duo tempore aestivali, unum hyemali. Siqua querimonia ab Abbate vel ab ejus amministratoribus judicibus meis fuerit oblata, quae banno erit terminanda, unus cedet juri meo, duo Abbati. Furtum enim et rapina, pugna, incendium, violentia, pervasiones domorum nocturno vel diurno factae juri meo cedent plenarie. Porro curiae servientes coci, pistores seu quicunque curiae servitio mancipati advocati judicio non tenentur. Vinitores quoque et piscatores placita non adibunt, nisi forte pro aliqua querimonia specialiter citati fuerint Exactiones vero, quae in diversis emerserunt tum agnorum, tum frumenti, turn quorumlibet aliorum petitione, omnimodis prohibemus. Testes Liutoldus de Gutenberch, Chunradus de Chindenberch, Amelbertus de Lohhusin, Bernhardus de Trune, Wulfinch de Chafenberch, Gundaker de Styra, Pernger de Trune, Warmunt de Cierberch, Otto de Volchenstorf, Pillunch de Pernstein, Ortolf de Griezchirichen, Bruno de Ipphe, Erchengerus de Landesere, Otto Sun, Adelbertus de Chiricheim, Gotfridus de Puchsliten, Rudbertus de Paesching, Rupertus, Bernhardus, Hartwicus, Lembertus alijque quamplures. Data Chremesmunasterij anno Dominicae Incarnationis MCLXXVIIII.

Source Fulltext: OÖUB 2 (Wien 1856) S. 367-368