Urbanus episcopus servus seruorum dei dilecto filio M.¹⁾ abbati Sancti Georii in sweuia salutem et apostolicam benedictionem. Cum svper intrvsione et incubacione tua, qua monasterium Chremise niteris detinere, licet in aliquibus abbaciis officium exerceas, et aliis enormitatibus, quas pro obtinenda eiusdem monasterii abbacia, circa dilectos filios nostros electum et fratres ipsius ecclesie tam tu quam germanus tuus pataviensis episcopus non es veritus perpetrare, quas etiam in eodem monasterio moram faciens addidisti ad felicis memorie Lucium III. papam predecessorem nostrum fratrem ipsius ecclesie grauis conquisitio pervenisset dilectis filiis nostris de Cruce sancta et de Gaersten abbatibus Saltzpurgensi et Neunburgensi prepositis excessum tuum commisit auctoritate apostolica corigendum dans ei pariter in mandatis, vt prefato episcopo fratri tuo, si constaret eius, que de facto ipso proposita fuerant adversus eum districtius iniungerent ex parte eius, vt usque ad festum sancti luce proxime preteritum satis facturus detanto excessu apostolico se conspectui presentaret, alioquin eum ab officio pontificali suspenderent et facerent manere suspensum, donec mandatum apostolicum impleret. Verum sicut eorundem fratrum iterata et miserabilis conquestio patefecit, cum ipsi iudices te ad suam presenciam evocassent, tu iudicio consciencie iam dampnatus ad eorum presenciam accedere contempsisti. Nolentes ergo, vt prefatum monasterium sub incubacione tua penitus destrvatur, quod iam per insolenciam tuam, sicut accepimus, in pluribus est elapsum, per apostolica scripta tibi mandamus et in obediencie virtute precipimus, vt omni occasione et excusacione cessante in dominica, qua cantatur Oculi mei semper, in persona et expensis propriis iam dictis fratribus de omnibus, que aduersus te proposuerint, responsurus nostro te conspectui representes et fratres ipsos interim per te vel per alios non molestes. Data Verone Idus Decembris.

Source Fulltext: OÖUB 2 (Wien 1856) S. 397