In Nomine domini Amen. Vt frequens obliuio, que bone recordationis federa et pias causas in mentis ducit exilium et errorem, a nostris procul finibus expellatur, Nos B. dei gratia Abbas Chremsmunstrensis Ecclesie totumque collegium loci eiusdem scripture testimonio dignum duximus conmendare Ac presentibus publice protestamur, Quod inminente tempore, quo nos B. Abbas pro nobis et conuentu nostro Ad concilium generale quosdam de fratribus nostris transmittere contingebat, et propter dispendia rerum et diuersos defectus monasterij nostri paratam pro expensis pecuniam sufficientem nulla industria sev studio habere possemus, propter hoc specialiter, prout moris est, in nostro capitulo conuenientes omnium nostrum in hoc resedit consilium et uoluntas, Quod ab Hainrico clerico dicto de Inne, nunc prouisore Mute in Obernberg predicta urgente necessitate recepimus XXX marcas puri argenti, quas dedit et tradidit nobis paratas, et in recompensationem eiusdem pecunie unanimi consensu pro nobis et successoribus nostris uice et nomine monasterii nostri libera donatione dedimus et contulimus dicto H. recipienti iure precarie pro tempore uite sue Mediam partem Curie nostre in Ekkenperch cum decimis et omnibus et singulis, que infra confines dicte curie continentur, Accessibus et regressibus suis usque in uiam publicam et cum omnibus et singulis, que habet supra se uel infra se sev intra se integraliter omnique iure et actione, usu sev requisitione dicte curie modo aliquo pertinente, Solo iure excepto, quod aput nos uulgariter nuncupatur Wochendinst, Ad habendum, tenendum et possidendum et quicquid sibi deinceps pro tempore uite sue placuerit faciendum, Saluo nobis et monasterio nostro iure dominii et proprietatis. Huiusmodi autem donationem sev collationem fecimus tali pacto, Quod si a festo Georii proximo ad duos annos Curiam domini Wetzelonis in Sippach cum omnibus suis pertinentiis in totum absolutam sibi conferemus et assignabimus, extunc media curia in Ekkenperch Ad nostrum redibit monasterium et cedet nostris iuribus sicut ante et curia in Sippach integraliter cum suis pertinentiis ad ipsum Heinricum deinde pertinebit omni iure, sicut de alia superius est expressum. Post tempus uero pretaxatum, si ante non procurauerimus permutationem, ut est predictum, talis permutatio in sue resideat arbitro uoluntatis et si forte priorem mediam curiam elegerit retinere et prouentus eiusdem plus ualeant quam prouentus curie in Sippach cum suis pertinenciis, illud nobis refundere tenebitur ad arbitrium domini Engelschalci de Inne, Ottonis de Ahliten, Ulr. de Sluzzelberch, Richeri de Edelspach, quorum arbitrio refusionem huiusmodi duximus comittendam. Misimus autem nuncios dicti H. loco ipsius in corporalem possessionem medie partis curie sibi collate et tradite in Ekkenperch, promittentes unanimiter et sincere .pro nobis et successoribus nostris vice et nomine monasterii nostri litem uel controuersiam sibi uel alij suo nomine possidenti super dicta curia media uel suis pertinenciis ullo tempore non inferre nec inferenti modo aliquo consentire, Sed ipsam cum omnibus suis iuribus supra expressis sibi uel alteri suo nomine possidenti pro tempore dumtaxat vite ipsius H. ab omni homine et uniuersitate legitime defensare et auctorizare et predictam donationem concessionis et omnia et singula supradicta firma et rata habere et tenere et non contrafacere uel uenire per nos uel per alios de iure uel de facto sub pena expensarum et refectione dampnorum extra litem et in lite sub obligatione bonorum monasterii nostri Et pena soluta uel non, predicta firma perdurent. Ad hec sepedicto Heinrico tanquam speciali nostro et caro sincere in domino damus fraternitatem conuentus nostri, omnium beneficiorum nostrorum ipsum in domino participem constituentes et in signum istiusmodi fraternitatis sibi singulis annis unum pellicium et duos filtratos calcios ordinamus et constituimus in festo Martini de Camera nostra dari. Ut autem omnia et singula supradicta permaneant inconuulsa, nos B. abbas sigillo nostro et nos fratres de collegio concordi uoluntate sigillo capituli nostri in hiis scriptis redacta decreuimus comunirj. Testes uero sunt isti: dominus Engelscalcus et Wernhardus fratres dicti de Inne, Otto de Ahliten, Vlricus de Slvzelberch, Richerus de Edelspach, Heinricus de Egendorf, Otto de Aitterbach et alii quam plures. Acta et data sunt haec Anno domini M. CC. LXXIIII. VI. Nonas Martij.

Source Fulltext: OÖUB 3 (Wien 1862) S. 402-404, Nr. 440