Ich Alber uon Chunringen uergich an disem prief und tun chunt allen den, die in sehent oder horent lesen, Daz ich heren Hainreichen uon Achleitten und allen seinn Erben uerlihen ze rechtem Lehen daz guet datz Tuedech, daz pei dem Livbempach leit, daz heren Wolfgans leibpgeding ist vntz an seinn toed, vnd pin auch des selben gueds sein vnd seiner Erben rechter herr vnd auch gewer vnd scherem an aller der stat, swa in sein noet geschicht fuer all ansprach. Vnd daz heren Hainreichen von Achleitten vnd allen sein Erben diw^e red stet weleib vnd vnferchert, darvber gib ich in diesen prief uersigelten mit meinem insigel. Des ist ziw^egch her Espein von Hag, her Hainreich von Gerolfstorf, her Hainreich der Chaiser, Dietmar von Aistershaim, Perchtoldt von Harthaym, Herwort der Chremstorfer, Ott von Percheym vnd ander pidwer Leut genueg. Der prief ist gegewen da von Christes purdt waren ergangen Tausent Jar driw hundert Jar vnd darnach in dem zwainzigstem Jar an dem Sunwendtag.