Ich Christan, ze den Zeiten Perchmaister meines Herren von Valchenberch, vergich offenbar an disem brief und tuen chunt allen den, di in ansehent oder horent lesen, daz Fridreich vravn Chungunden sun, der Stuerminne, ze der zeit, do er iz wol getuen macht, getailet hat seinen Eribtail mit seiner mueter, vravn Chungunden und mit allen seinen geschwistreiden, und ist im gevallen ein drittail eins geu^echs aus einem weingarten, leit in der ziegelgrueb mit rechter furzicht, do man van geit alleu Jar in dem Lesen einen emmer wein ze Perchrecht, und hat der vorbenant Fridreich den vorbenanten weingarten geschaffet dem Erberm Coventt ze Chremsmunster in ir obley nach seiner seligen Mueter tod, vravn Chungunden durich seines vater sel und aller seiner vodern sel willen, und hat auch sich der vorbenant Fridreich des vorbenanten weingarten furzicht getan mit Christans Hant des Perchmaisters mit sogetaner beschaidenhait, daz der Erber vorbenant Coventt seinen frum da mit schaffen sol mit versetzen und mit verchauffen nach seiner mueter tod vravn Chungunden an allev irrunge. Pint auch sich der vorbenant Fridreich und sein Mueter vravn Chungunde und sein prueder Christan und sein prueder Jans und sein zwester Elspet und vrav Agnes, Katrey und vrav Pericht unverschaidenleich mit iren treun, daz si dem Erberm Coventt den vorbenanten weingarten scherm sullen fur sich und fur all Erben und fur all ansprach, als Landes recht ist. man sol auch von dem selben weingarten aller Jerichleich suechen dro^e taidnich, daz deu red stat und zebrochen (sic) beleib, dar uber gib ich disen brief ze einem sichtigen urchunde versigelt mit meinem Anhangenden Insigel. Diser sach sind gezeug Her Gerunch der Chol, Her Engeldiech, Her Dietreich, der Schiuer, Chunrat, der Schiuer, Gebhart von sand Moertein, Gerbot, der alt Sluzler, Symon, Gebhartes sun, Fridreich, der Hetzman, Chunrat, der Mosel, Wernhart, Leubleins, des smides sun, Jans sein prueder, Ortolf ze der zeit Hofmaister und anderr pideber leut genueg. Ditz ist geschehen, do man zalt von Christes gebuerde dreutzehen hundert Jar dar nach in dem zwai und tzwaintzichistem Jar an sand Go^erigen tag.

Source Fulltext: OÖUB 5 (Wien 1868) S. 634-635, Nr. XLIII (Anhang)