Johannes episcopus, servus servorum dei Dilectis filiis Abbati et Conventui Monasterii in Cremsmunster ordinis sancti Benedicti Pataviensis diocesis Salutem et apostolicam benedictionem. Cum a nobis petitur, quod justum est et honestum tam vigor equitatis quam ordo exigit rationis, ut id per solicitudinem officii nostri ad debitum perducatur effectum. Eapropter dilecti in domino filii vestris justis postulationibus grato concurrentes assensu omnes libertates et immunitates a predecessoribus nostris Romanis Pontificibus sive per privilegia vel alias indulgentias vobis et vestro Monasterio concessas necnon libertates et exemptiones secularium exactionum a Regibus et Principibus ac aliis Christi fidelibus rationabiliter vobis et Monasterio vestro predicto indultas sicut eas juste ac pacifice possidetis, vobis et per vos eidem Monasterio auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre confirmationis infringere vel ei ausu temerario contraire. Siquis autem hoc attemptare presumpserit, indignationem omnipotentis dei et beatorum Petri et Pauli Apostolorum ejus se noverit incursurum. Datum Avinione II. Nonas Junii Pontificatus nostri Anno Sextodecimo.

Source Fulltext: OÖUB 6 (Wien 1872) S. 63f., Nr. 54