Wir Mertt von gotes genaden Abpt ze Chremsmu^enster, Bechennen offenleich mit dem brief allen den, di den brief sehent, vnd ho^ernt lesen, Das vnser O^echaim Jörig von Volkchenstorf, zu vns chom, vnd pat vns, das wir im verlihen, von sundern genaden die manschaft di im vnser voruoder Abpt Chunrat sa^eliger gelihen het, auch von sundern genaden, der, der vierd Abpt, vor vnser gewesen ist, vnd im di brief vernewten, di im der selb Abpt Chünrat gegeben het, das haben wi^er getan, vnd haben im di selb Manschaft, vnd gu^eter verlihen, ze Rechtem Lechen, im vnd seinen Eriben, vnd di vnsern Voruodern, Abpt Chu^enraten von vnserm Gotzhaws ledig woren worden, mit dem Tod, von Ortolfen dem Volkchenstorffer, von Chemnaten, säligen, der des vorgenanten Jörgen, von Volkchenstorf Veter gewesen ist, vnd di Manschaft her nach geschriben stet, des Ersten den zechent dacz Haibrechting, den Obern, vnd den Nidern, als er ze samm gehört, vnd von alter her cho^emen ist, vnd ain Lehen in der Gru^eb pey Haimpuech, vnd den zechent ze Chemnaten, auf der aw^e, vnd auf zwain gu^eten, datz Chotzczell, vnd auf dem Linta^ech genant dacz dem zehentna^er, als er ze samm geho^ert, vnd den zechent, auf der Lerbelhu^eb vnd in dem Holtz, vnd dacz dem Sichtlein, in dem Ra^ewt als er ze samm geho^ert, vnd den zehent auf dem Hof ze Chrems, vnd dacz Chumreinstorf, vnd auf der Hueb auf dem veld, als er ze samm geho^ert, gelegen in sand Marein pharr, vnd ain zehentha^ews, auf dem Vnmach vnd ain Lechen auf dem Lintäch, genant dacz den Haw^esern, vnd ain Mu^el dacz Deitenfu^ert, vnd drew gu^etel, vnder dem Tamperg, vnd den zehent auf dem Obern Linta^ech, genant, auf den guetern, dacz Chreusperg, ain Drittail zehents auf dem Hof, vnd ain zehenthaw^es datz Smidleiten, vnd den zehent datz Sijpach an der Chotmu^el vnd auf den zwain Ho^efen dacz Phfrillhof, vnd in dem Graben dapey, vnd an den zwain Redern, vnd auf den zwain Lechen dacz Gukelperg, vnd auf dem Lechen dacz Weingarten, vnd was zu dem selben zehent geho^ert, chlain vnd gros, das selb alles was des ist, vnd da von becho^emen mag, haben wi^er in gelihen, ze rechtem Lehen, Wi^er schullen auch der obgenanten Manschaft, vnd gu^eter, i^er herr, scherm vnd gewer sein. als Lanndes recht ist, ob der Ens, Und des ze v^erchu^end geben wir in den Offen brief, versiegelt, mit vnserm anhangundem Jnsigel, Daz ist geschehen do man zalt von Christi gepu^erd, Drewczehen Hundert Jar, Und dar nach in dem New^en vnd Sibenczigisten Jar an Sand Luczein Tag.

Source Fulltext: OÖUB 9 (Wien 1906) S. 765-766