Wir Gedrawt abtessinn vnd ich Elzpeth priorinn vnd der gantz conuent des gotzhauses zu Slierbach bekennen vnd tun kunt offenleich mit dem brieue für vns vnd vnser nachkomen, daz wir den edeln herren hern Hansen von Liechtenstain des hochgebornen fürsten hertzog Albrechts hertzogen zu Österreich etc. hofmaister vnd allen sein erben zu vnserm vnd aller vnserr vnd desselben vnsers gotzhauses güter, wa die gelegen vnd wie die genant sein, es sein kirichenlehen oder andere güter, zu aimm rechten herren vnd erbvogt genomen haben vnd nemen wissentleich mit dem brief durch des willen, das vns vnd dez egenanten vnsers gotzhauses guter in seiner herschaft zu Pernstain gelegen sind, vnd verpinden vns auch mit dem brief, daz wir dhainn andern vogt nicht nemen sullen noch wellen denn denselben hern Hansen von Liechtenstain vnd all sein erben, die die herrschafft zu Pernstain inn habent. Vnd ob wir daruber dhainn andern vogt nemen, das sol dhain krafft nicht haben in dhainn weis. Auch sol der egenant her Hans von Liechtenstain vnd all sein erben, die die herschafft zu Pernstain inn habent, vns vogten vnd schiermen vor gewalt vnd vnrecht vnd sullen vns vnd vnsers gotzhauses erbvogt vorgeer verweser vnd andere stiffter sein, als wir in des gentzleich getrawen vnd emphelhen vns auf ir trew. Item so loben wir in für ir vogtrecht vnd auch durch der trew vnd freuntschafft willen, die der obgenant her Hans von Liechtenstain zu vns vnd vnserm gotzhaus gehabt hat vnd noch hat, vnd auch durch des willen, das er sich gnedicleich vmb vns hat angenomen, jericleich an vnserr Frawntag zu der Kundung ain ampt zu singen von vnser Frawn, darinn wir desselben hern Hansen von Liechtenstain vnd seiner hausfrawn Elzpethen von Liechtenstain vnd ir baider erben selen gedenken sullen. Vnd des zu vrchund geben wir den brief versigelten mit vnserm obgenanter der äbtessin vnd auch des gantzen conuents anhangunden insigeln. Der brief ist geben zu Slierbach an Suntag nach dem Auffarttag nach Krists gepurd drewtzehenhundert jar darnach in dem viervndnewntzigistem jar.

Source Fulltext: OÖUB 11 (Wien 1983) S. 287-288