Wir Mertt von Gocz genaden abbt des goczhaus ze Kremsmünster vnd der conuent gemainichleich daselbs wir veriehen mit dem brief vmb die lehen des sitz benant cze Tudech mit seiner zugehorung glegen pei der Trawn in Weizkircher pfarr, der von vns vnd vnserm gotzhaus ze lehen ist, das wir diselben lehen durch der dinst vnd furdrung willen, so vns vnd vnserm gotzhaus der edel her her Hanns von Liechtenstain zu den zeiten des hochgeboren durchleuchtigen fürsten herczog Albrecht ze Osterreich hofmaister allzeit getrewlich getan hat vnd noch hinfür wol getun mag, im vnd alln seinn erben verliehen haben vnd verleichen auch mit kraft des brifs, also das er vnd sein erben diselben lehen von vns vnd vnserm gotzhaus hinfür ze rechten manlehen haben vnd nyessen sol, als lehens vnd des lands ob der Ens recht ist vnd die auch furbazzer verleichen suln vnd mugen den erben, die si yetz besitzend oder verrer, auch als lehens vnd des landes ob der Ens recht ist, vngeuerlich. Mit vrchund des brifs versigelt mit vnser obgenanten abbt Mertten vnd des conuents ze Kremsmünster angehanngenn insigeln. Geben ze Kremsmünster am Montag vorm Phingstag anno etc. LXXXXIIII°.

Source Fulltext: OÖUB 11 (Wien 1983) S. 288