Wir Mertein von gots genaden abbt des gotshaws Kremsmünster und der conuent daselbs gemainchleich wir veriechen für uns und unser nachkomen und tun chund mit dem brif, daz wir schuldig sein und gelten schulen der erbern frawn Dorothen von Hahenberg hern Hansen von Polhaim seligen witiben und irem chind Dorothen, daz si pey dem vorgenanten hern Hannsen dem Polhaimer hat, zwöliffhundert phunt wienner phenning, die si uns in gueten trewn zu unsers gotzhaws notturfft berait gelichen habent, desselben gelts wir di vorgenanten frawen Dorothen virhundert phund unverczogenleich richten und wern sullen, wann die sy uast an uns vodrent, darnach inner czwain maneiden, der si nach gescheft ires obgenanten wirts aws gerichten bedurffund ist; geschech aber des nicht, swas si des schaden nympt, daz sulen wir ir ablegen und widerchern und so(1) sy daz haben ze uns und auf aller unsers goczhaws hab. Dann di achthundert phunt phenning, (die) ir obgenant chind Dorothen angehören, der wir sey und desselben ir chind auch unverczogenlich richten und wern sulen, van Mittvasten, die schirert koment, über ein gancz iar auf Mittvasten in dem land ze Österreich ob der Ens, in welher stat daz selb sey, die (si) von uns wegerent und haben wellen, an all irsal ungeverleich, wan si daz chind und die acht hundert phunt inn haben und nyesen sol, all di weil si an man ist. Nymbt si aber ein man, so sol Weikchart von Polhaim, hern Pilgreims sun, di egenanten achthundert phunt phenning und auch daz chind in haben und nyesen sol, alz si di egenant fraw Dorothe in gehabt hat, und sein wir im und dem chind dann der schuldig auffzerichten an aller mazz, alz vor begriffen ist. Wer aber, ob daz selb chind Dorothen an erben abging, so erbent dy vorgeschriben acht hundert phunt phenning auf Weikcharten von Polhalm, hern Pilgreims sun, und sein nast erben nach dem landsrecht. Wer aber, daz wir di obgenant frawn Dorothen und ir obgemelt chind der acht hundert phunt phenning in der vorgeschriben zeit nicht genczlich richten und wern, darumb haben wir in ze fürphand awsgeczaigt und gesaczt unser drey hof ainer genant zu Krems gelegen in Kirchdorffer pharr, der ander ze Nuspach, der dritt zu Weingarten paid gelegen in Wartperger pharr, und mit allen den zehenten, di zu denselben drein hofen gehorent, das si diselben höf und zehent all mit allen iren zugehörungen gwalt und recht habent sich zu underbinden, und di mit allen nuczen eren und rechten in saczes weis innhaben und neyessen soln, als wir si in aigens gwer herpracht haben, an abslag der nücz des obgenanten haubtgutz. Wer aber, wenn si des satz nicht lenger haben wellent, noch irr obgenant acht hundert phunt phenning nicht enpern mugen, daz suln si uns ein halbs iar vor kund tun. Ist, daz wir si dann desselben ires geltz nach der manung in der egenanten zeit nicht awsrichten und wern, swaz si dann irs gelts fürbaz schaden nemen, swie di genant sind, di ir ains oder swer den brif mit irem guten willen fürpringt pei sein trewn an als recht gesprechen mag, diselben scheden mit sambt dem haubtgut sulen wir in ablegen und widerkern und suln auch si daz alz haben ze uns und auf aller unsers gotzhaus hab und gutern, sa wir und unser gotzhaus haben, inner lands oder awzzer lands auf wazzer auf land versucht und unversucht, und sol si der landsfürst oder sein gwalt, wa si darauf komen und zaigend, als vil in antburtten und weltigen, als ver uncz si irs geltz haubtgutz und schadens genczlich davon bechomen und awsgericht werden; daz ist unser gutleich wille, an all unser hindernuzz irrung und widerred angever. Des zu waren und vesten urchund geben wir obgenant abbt Mertt und der convent ze Kremsmünster den brif für uns und all unser nachkomen versigelten mit unser paider insigiln. Datum an Suntag Reminiscere anno LXXXX quinto.

Source Fulltext: OÖUB 11 (Wien 1983) S. 385-386