Ich Wernhart Mair Im Pach ze Chremsmuenster mein hausfraw vnd alle vnser erben Wir veriehen vnd tun chund mit dem offenn brif alln den, di in sechent oder horent lesen, daz wir mit veraintem muet vnd guetlichem willn zue der zeit da wir das mit recht wol tuen machten redleich vnd recht mit recht fürtzicht verchauft vnd zu chauffen gebn haben dem Erwuerdigen gaistlichen herren hern Marttein Abbt des gotzhaus ze Chremsmunster alln sein Nachkomen vnd dem gotzhaus daselbs vnsern hof genant zu Epping gelegen in Kempnater pharr, den wir ze rechtem erblehen gehabt haben von dem egenanten gotzhaus zu Kremsmunster, vnd der vnser chauff gebesen ist von der erbern frawn Annen Hannsen des Paternustrer seligen witiben. denselben hof mit aller zuegehorung versucht vnd vnuersucht, als wir den in nutz vnd gwer herpracht haben vnd mit alter herchomen ist, also haben wir In dem vorgenanten Wüerdigen herren Abbt Mertten vnd dem gotzhaus ze Kremsmunster ledichleich gegeben mit alln nuetzen, eren vnd rechten, di dartzue gehorent vnd dauon bechomen mugen vnd mit aller vrchund vnd rechten, di wir darueber vnd daran gehabt haben, aws vnser gwer vnd gwalt in ir nutz vnd gwer vnd mit aller stet als wir ze recht solten vmb ein gelt des wir gar vnd gantz von in verricht vnd gewert sein. In der beschaiden, das der vorgenannt her vnd all sein Nachkomen denselben hof mit aller zuegehorung zu allm iren frum haben vnd nyessen suln vnd alz das damit handeln vnd tuen, als mit andern irs gotzhaus aigenlichem guet an allen irrsal. Vnd sein auch wir des vorgenanten hofs mit aller zuegehorung des egenanten herrn Abbt Mertten ze Chremsmunster seiner Nachkomen vnd des gotzhaus daselbs recht geweren vnd fuerstnant zu rechten chauff nach lands recht. ging in daran icht ab mit recht des si schaden naemen, das ir ainer der den brif furpringt pei sein trewn an alls recht gesprechen mag, denselben schadn suln wir in ablegen vnd widerkern vnd suln si daz haben ze vns vnd auf aller vnser hab, wir sein lebentig oder tod. Vnd des zu eim waren Vrchund gib ich obgenanter Wernhart Mair mein hausfraw vnd all vnser erben den brif versigelten mit der erben weysen Hainreichs des Getringer, Christan des Roeten vnd Wolfgangs des Humbrechtsrieder di zeit Richter ze Kremsmunster aller anhanngunden Insigeln, di si durch vnser vleissige pet willen zu guet zeugnuzz der Sach an den brif gehanngen haben, In vnd alln iren erben an schaden. Vnder diselben vorgeschriben Insigell alle wir vns verpunden haben mit vnsern trewn an aydes stat, alls daz stet halten vnd volfueren, das an dem brif verschriben stet, wann wir Insigels nicht haben. Geben an Suntag sa man singt Oculi in der Vasten nach christs gepurde dreutzehen hundert Jar vnd in dem funff vnd newntzigisten Jare.