Ich Syman Weikharcz sun cze Sttanmawr, dem got genad, vergich für mich vnd mein hawsfraw vnd all vnser eriben vnd tun chunt mit dem brief allen den er fürchumpt, das ich mit dem edlen vnd erwierdigen hern abt Merten zu Kremsmunster mich nach fleissig bet betaidingt hab, daz ich mit seim vrlawb gunst vnd willen vnd mit rechter schied ab seins goczhaws erib güt ze baren vnd mich häwsleich czu burger seczen schol vnd mag in stet, märkcht vnd ander herscheft, wo mir das fügt, an alle hinderung, darumb ich mich gen im vnd sein nachkomen vnd gein dem goczhaws ze Kremsmunster verlubt vnd verpunden han, verhaizz vnd versprich auch wissenlaich mit dem brief von des erib gucz wegen genant ze Willeinstorf, daz von Mathes am Weg herchömen ist, in Petenpechär phar gelegen, daz ich noch als von dem egenanten goczhaws zu eriblehen hab, daz ich mein hawsfraw vnser eriben vnd holden, so wir darauf haben, aim igleichen hern vnd abt dez goczhaws zu Kremsmunster allen iren dienärn vnd amptläwten daselbens mit allem dinst stewr rechten vnd vodrung von dem vorgenanten gut dulden vnd leiden schullen vnd in trewleich damit geharsam vnd gewärtig sein wellen als von alter dauon gehört, als ander des egenanten goczhaws eribgüter dulden vnd leiden, in welher herschaft vnd steten wir gesezzen sein an anzzug vnd widerred angeuär. Vnd sullen wir darin chains scherms freyung noch sunder rechten vnd freibrif noch burgerrecht, di wir haben oder dawider gewinen mochten, in den sachen, wie sich daz fügät, wider sew nicht gemessen noch chain aufschub noch vngeharsamchait darin tün wellen, sunder wir in die egenanten vodrung vnd rechten schuldig sein aufczerichten alz oben begriffen ist. Wär aber daz wir oder vnser eriben daz verczugen vnd nicht ausrichtäten, so mag sich der abt zu Kremsmunster sein anwalt oder sein amptman des vorgenanten gütz als ver vnderwinden, daz er seiner vodrung vnd rechten wol dauon bechumpt vnd daz wirs vmb sein genad abtragen. Auch sullen wir daz egenant gütt bey güttem paw halten vnd haben, daz inn ir vodrung fuderleich dauon geraicht werde, vnd sullen auch daz nyndert anderswo hin verchumbern denn läwtten, den man von des egenanten goczhaws wegen gern leicht. Des cze vrchunt geben wir in den brief versiglt mit des erbärn weisen Fridreichen dez Kraften, die czeit amptman ze Gmunden, vnd Christan des Franberger, ainer des racz daselbs, baider anhangunden insigln, die si durch vnser fleissigen pet willen czu gütter zewgnüzz der sach an den brif gehangen habent in vnd all iren eriben an schaden, darunder wir vns verpunden haben mit vnsern trewn an aides stat als daz halten vnd volfüren, daz an dem brif geschriben stet. Geben an Erichtag nach sand Peter vnd sand Pawls tag nach Christi gepürd drewczehenhundert iar darnach in dem newn vnd newnczkisten iar.

Source Fulltext: OÖUB 11 (Wien 1983) S. 838-839