Vniuersitati fidelium tam presencium quam futurorum per presentis scripti paginam declaratur, quod Bernhardus Lambacensis ecclesie abbas vnanimi consilio confratrum suorum concessit iure hereditario Heinrico de hornorn et duobus filiis suis Hugoni et Maisoni omnique posteritati ipsorum quandam curiam in Stru^etzing sitam tali videlicet condicione, ut singulis annis in festo sancti Michaelis pro stewra et seruicio talentum et XV denarios pro stewra aduocacie persoluat. Cum uero die prefixo seruicium persoluere neglexerit, sequenti die lx denarios, quod uulgari lingwa dicitur wandel, cum seruicio persoluere tenetur. Precones uero siue aduocati nil iuris preter seruicium in eadem sibi debent curia vsurpare. Filie uero predicti Heinrici cum heredibus ipsarum ab hereditate et iure istius curie totaliter excluduntur ita, ut si predicti filii Heinrici sine heredibus decesserint, eadem curia cum omnibus attinenciis in vsus congregacionis in Lambach omni contradictione amicorum et propinquorum penitus submota libere debet cedere et quiete. Otto eciam predicte congregacionis camerarius concessit eidem Heinrico quoddam beneficium in Stru^eczing eo iure sicut predictum est ita tamen, vt singulis annis camerario xxx denarios persoluat. Ne ergo talis concessio possit in posterum per antiquitatem temporis reuocari, testimonio subscriptorum testium confirmatur. Testes Fridericus de Stru^eczing et Fridericus de Aicham, Siboto de Samatinge, Herrandus de Hornorn, Ditmarus de Volspach, Herbordus caupo, Heinricus filius suus, Heinricus preco, Albero preco, Chunradus pellifex, Hertivicus de foro Et alii quam plures. Acta sunt hec Anno domini Mccxlvij.

Source Fulltext: OÖUB 4 (Wien 1867) S. 561-562, Nr. XII (Anhang)