Ich dietel der Oven vergihe allen den, die den prieff ansehent oder lesen horent, daz ich daz gut, daz da haisst nidirnvils, ein halb phunt gelts an vnser frawen tag zer dinstzeit han gegeben ze einem selgeret dem gotshaws ze Lambach mit meiner hawsfraw vnd meiner chinder vnd all ander meiner gerben guten willen, das wir furbaz chain ansprach da nach haben sullen vnd das daz furbas vm bechrenckt von uns vnd allen leuten beleib, han ich meinen herren von Walsse herrn Eberharten den Lantrichter ob der Enns gepeten, daz der sein Insigel zu dem meinen Insigel an den prieff hat gehangen, wan ez ze wels in der stat vor im in der schrann ist geschehen da nach christi gepurt sind gewesen tawsent jar vnd drewhundert jar in dem dritten jar, da en gegenwurt sind gewesen Dinstman, ritter vnd knecht: der chunrat von Cappelln, der Chunrat von volkestorff, der weickart von Pollnhaim, der Rudolff von Lichtenwinchel, der ditmar von Astersheim, der Espein von Ebelsperg, preitenuelder paid pruder vnd ander, die in demselben taiding waren, ritter vnd chnecht die menig.

Source Fulltext: OÖUB 4 (Wien 1867) S. 453, Nr. 488