Wir Sigmar von gotes gnaden Abbt ze Lambach vnd di gantz Samvng desselben Gotshavs Tvnn chvnd allen den, di disen brif sehent oder ho^erent lesen, daz wir mit gemainem rat vnd mit gv^eter beda^echtichait der vorgenanten samvng haben verlihen den gantzen hoff ze Avwertal, der nv entzwai getailt ist, vnd allez daz, daz zv dem hoff geho^ert ze holtz vnd ze veld, Chvnraten ze Avwertal vnd seiner hav°svrowen Petersen vnd ir paider nachchvnft ze rechtem Erib Also, daz die vorgenanten lav^et vns von dem vorgenanten hoff schv^ellen dienen alle Jar Zehen chast mv^ettel chorens vnd ayndlef chast mv^ettel habern vnd zwai swein an sand Andres tag, di eines halben pfvntes pfenning werd sein, vnd ze Weinachten sechzig pfenning ze pavstewer vnd dreizig pfenning an sand Go^erigen tag, daz da haizzet Vogtpfenning, vnd vier Gens vnd aht hv^ener an vnser vrv°n tag ze der dienstzeit vnd zwen zenten Ayer,ainen ze Ostern vnd ainen ze pfingsten vnd sand Kylians lamp vnd anders niht, Vnd swann er oder sein geriben den vorgenanten dienst dienent von dem vorgenanten hoff, so sol er oder sein nachchvnft daz iar aller ander vadrvng gerv^et sein vnd ob der vorgenant Chvnrat von Avwertal an geriben stvrib, so sol sein hav^esvrv° vro Peters daz reht an dem vorgenanten hoff haben nv^er zv ir tagen vnd sol dann der vorgenant hoff mit dem vorgenannten reht wider an eriben des vorgenantes Chvnrates prveder, wand si dann reht geriben sind. Vnd daz daz sta^et vnd vnverwandelt den vorgenanten la^evten beleib, geben Wir in disen gegenbv^ertigen brif zv einem Vrchvnd versigelten mit vnserm Insigel vnd mit vnsers Conuents jnsigel vnd sind des Zevg Her Rainpreht von Polnhaim, her Alber sein prvder, Her Ha^ertneid von Travn, Hainrich der chropff, maister Ott ze wels, Sighart der vlaischacher, Jacob ze wels, ditmar der havnolt vnd sein vater ditmar, Fridreich der Rizendorfer vnd ander piderb lav^et genvg, den diser geberf chund ist. Diser brif ist gegeben ze Lambach, do von Christ gepvrt waren ergangen Tavsent jar, drevhvndert jar, darnach in dem Na^evnten jar an sand Marein Magdalen tag.||
Mutatum est hoc reseriptum aliquantulum per aliud priuilegium. Notum, quod si Chvnradus de avwertal moritur sine liberis uel pueris, tunc ordinauimus Ecclesie Lambacensi pro anime sue remedio de media Curia in avwertal omni anno in natiuitate beate virginis vnam integram libram denariorum wienensium sine dubio darj.

Source Fulltext: OÖUB 5 (Wien 1868) S. 24-25, Nr. 21