Wir Albrecht von gotes gnaden Hertzog ze Osterreich vnd ze Steyr, Embieten vnsern getrewen lieben ... dem Richter vnd ... dem Rat ze Gmunden vnser gnad vnd allez gut. wir gebieten ev ernstlichen vnd wellen auch, daz ir schaffet Jacoben dem Ekker Purger von Gmunden, daz er ein recht nem in dem Stadel von dem gůtigen mann ... dem Apt von Lambach vmb sein gult, wan wir der chlag von dem apt nimer horen wellen vnd wellen auch, daz daz recht vor vtzen dem Lantrichter geschech, den wir ze einem Richter vmb die sache gegeben haben vnd wil er des rechtes awer nicht nemen, so wellen wir, daz der apt vnd daz Goteshaus ze Lambach furbaz von dem selben Jacoben der chlag vmb die gult ledig vnd gerubet sein. Der brief ist geben ze Lyntz des Eritages nach sant Lambrechtes tag.

Source Fulltext: OÖUB 5 (Wien 1868) S. 407-408, Nr. 410