Wir Greiff von Gotes gnaden abbt ze Lambach veriehen und tuen chund allen den di disen prief sehent oder horent, daz wir einen weingarten von unserer pfruent gechaufft haben und haben den selben weingarten geschafft in deu chamer mit soelicher beschaidenhait, daz man alleu jar von dem egnanten weingarten ze Ostern einem islichem herren in dem chloster geben sol fumf und siwenczzk pfenning und in deu gustrai alleu jar ein albs pfunt pfenning zu einem ewigen liecht und den herren in der gmain ein halbs pfunt pfenning alle jar an unserm jartag. Und haben daz getan zu einer warnung unsrer sel, daz man der gedenchen sol an dem selben jartag mit mezz und mit vigili und auch mit aller gmain. Und daez daz staet und unverchert allenthalben fuerwaz beleib, dar uber geben wir disen prief zu einem urchund versigelten mit unserm insigel und mit dez convents insigel. Der prief ist gegeben du man zalt von Christes gepurd tausent jar dreu hundert jar dar nach in dem fumf und zwainzigistem jar an sand Gregorii tag.

Source Fulltext: Transkription JL, 29.5.2024