Wier Greyff von gotes gnaden Appt ze Lambach vnd auch di gantz Sammung da selben veriehen vnd tuen chund Allen den, di disen Prief sehent oder lesen ho^erent, Daz fuer vns chom der erber man Hainreich der alt Chropf purger ze wels vnd hat vns von seiner gwizzen allez daz benant an disem prief, daz er hat von vns ze rechtem Erib recht, er hab iz gechaufft oder iz sel in angeuallen von seinen vodern vnd haben auch im daz verlihen iem vnd seiner Hausurowen vrau Gedrauten vnd allen ier Eriben mit vnserm gueten wiln ze rechtem Erib Also beschaidenlich, daz er oder sein e gnantev Hausurowe oder ir Eriben, di daz guet inn habent, vns alle iar da von dienen schu^ellen in vnser Chamer an vnser vrowen tag zter dien zeit von eim guet, daz leit in der Schafwies, da Chunrat auf sitzet A^elbleins prueder auf dem hard, zwelif pfenning newer wienner vnd von einem guet in der Schafwis, da Alram der weber auf sitzet, zwainzig newer wienner pfenning vnd zwen vnd dreizig newer pfenning fuer ocht metzen habern vnd von einem Akcher, der geho^ert in daz selb guet, zehen nev pfenning. Dar nach hat vns der vor gnant Hainreich vnd sein êgnatev (sic) Hausvrowe mit ier guetem wiln vnd mit aller ier Eriben wiln vnd wart gegeben zv einem ewigen selgraet vnserm Gotzhaus zehen nev wienner pfenning, di si vns alle iar geben schu^ellen an vnser vrowen tag zter dien zeit in vnser Chamer von dem guet, da v^elreich der vischer auf sitzet an der pranstat, zehen pfenning vnd schol man vns den e gnanten dienst allen geben an vnser vrowen tag zter dien zeit vnd swenn si dez nicht entuent, so sind si vns aller der wandel gepunden, di dar nach geho^erent vnd schullen wier sev dar vm pfenden haizzen auf allen den gueten mit ier guetlichen wiln, si schu^ellen vns auch nicht mer geben nuer den zins weder ab vart noch todrecht noch dhain andre vodrung; wier schu^ellen auch der guet vnd dez Eribrechtz ier Herren vnd ier gwer sein, als eribrechtz recht ist. vnd daz daz stet vnd vnzebrochen allenthalben beleib, Dar v^eber geben wier in disen prief ze einem vrchu^end versigelten mit vnsern paiden jnsigeln, vnd sind dez gezeug her Chunrat der Slegel, her vlreich der fulich voyt ze wels, Rueger vnd Helmweig di platzzinsguet, Albrecht der zot, vlreich der Roentel, andre ze wels vnd ander erbser laeut. Der prief ist gegeben ze Lambach, dv man zalt von Christes gepurd tausent iar, drevhundert iar, dar nach in dem sechs vnd zwainzgistem iar an vnser vrowen tag zter dien zeit.

Source Fulltext: OÖUB 5 (Wien 1868) S. 457-458, Nr. 459