Wier Albrecht von gots gnaden Hertzog ze O^esterreich, ze Steyr vnd ze Chernden Tu^en chunt mit disem prief vmb daz vruar vber die Trawn an dem Nidern Stadel, daz vor gewesen ist vnt etliche iar versavmt ist, daz vnser wille vnd gescheft ist, daz man daz selb vruar daselbs wider haben sol Also beschaidenlich, wer ayn fůder weins da v^eber fu^eret, der sol von dem wagen acht wienner pbenning geben vnd von einem vas weins ze Vier vnd zwaintzik aymern sechs phenning, von aynem mvtt waitzes oder chornes Vier phenning vnd von aynem wagen swer mit habern vier phenning vnd von aynem isleichem wagen swer mit saltz oder mit welicher lay daz sei, der sol auch vber daz wazzer vier phenning geben. Vnd wann die wazzer chlayn sint, daz man die fu^erte bey der Trawn vnd bey der Eger mit wegen mag geuaren zwischent dem weizzen gemewr in der Trawn vnd zwischent obern Hardarn in der Eger, an welicher Stat er zwischent den zwayn Marichen vber geuaren mag, der sol von dem wagen geben aynen phenning ze Gruntrecht, hinvber aynen vnd hervber aynen, als oft er darvber vert. Vnd sol man darvmb stet an dem Vruar warten mit beraiter schiffung, daz iemant da gesavmt werde, wan daz Vruar von alter her an derselben Stat gewesen ist. Ez sein auch die wazzer chlayn oder grozz, so sol man ni mer geben von aynem wagen vber daz wazzer, wenn vo^er geschriben stet. Vnd wenn auch newe phenning sint, so sol ein isleich wagen nêwe phenning geben an den vo^ergeschriben setzen fu^er so vil vnd die weil ier wert ist. Wier wellen ouch, daz man niemant von des Vruars wegen no^ette da v^eber ze varen, denn der gern da v^eber varen welle, der sol die mautt da geben, als vo^er geschriben ist. Dez geben (sic) ze Vrchu^ende disen prief besigelten mit vnserm Insigel, Der geben ist ze Wienn an dem Samztag vo^er Agnetis Anno domini Millesimo CCC°. Quadragesimo Secundo.

Source Fulltext: OÖUB 6 (Wien 1872) S. 400f., Nr. 397