Ich Magens der Puecher vnd ich Chlar sein hausvrawe wir veriechen vnd tu^en chunt allen den di disen prief sechend oder horend lesen, div nu lebend oder her nach chumftich werden, daz wir mit aller vnsrer erben gu^etlichen willen vnd wart vnd mit vnsrer besten frevnd rat zu der zeit, da wir ez wol getu^en mochten, vnd mit vnsers lechenherren hant hern Weychardes von Storichenberch recht vnd redlichen verchauft haben vnsern hof ze Schretental mit allen den nutzen, div durch recht darzu^e geho^erend ze holtz ze veld besuecht vnd vnbesuecht, wie daz genandist, Rvedolffen dem Pauzwekken vnd seiner hausvrowen vran Chlaren vnd allen ieren erben auz vnsrer nutz vnd gewer in ir nutz vnd gewer vmb achtzechen pfunt wienner phenning, der wir gantz vnd gar gerichtt vnd geweret sein, also beschaidenlich fu^erbaz ledichlichen vnd vreilichen ze haben vnd allen ieren frum damit ze schaffen mit verchauffen mit versetzen oder geben, wem si wellen an allen irresal. Vnd sein auch wir vnd vnser erben des obgenanden hofs vnd waz darzu^e geho^ert ir scherm vnd ir geuer fu^er alle ansprach, also lechens recht ist. Wer aber, daz in an dem egenanten hof vnd waz darzu^e gehoret, mit recht icht abgienge, daz sullen wir in allez auzrichten vnd widercheren. Teten wir des nicht, wiegetanen schaden siv dann des nemen, den sullen wir in abtu^en gantz vnd gor, vnd sullen si auch dazselbe haben auf vns vnd auf aller vnsrer hab, wo wir di haben, wir sein lemtich oder tode. Chem aber iemand herfu^er, der bezzer erib wold sein zu dem egenanden hof, denn der vorgenand Ruedolf der Pauzwekk vnd sein erben, der schol in geben fvmftzig pfunt wienner phenning an allen chrieg. Daz in div red stet gantz vnd vnzebrochen beleibe, darvber gib ich vorgenander Magens der Puecher disen prief versigelten mit meinem anhangunden jnsigel vnd mit meins lieben frevndes jnsigel Meinhardes des Tewerbanger, der diser sach taidinger ist gewesen. Vnd ich Chvnigund des vorgenanden Magens mueter verbinde mich vnder den zwain jnsigelen alle div tayding vnd div geluben div vorgeschoben stent, stet ze behalten mit meinen trewen. Geben nach Christs pu^ert vber drevtzechen hvndert jar dar nach in dem zway vnd fumftzikisten jar an sand Jacobs tag.

Source Fulltext: OÖUB 7 (Wien 1876) S. 289f., Nr. 285