Wir Vlrich von Gotes gnaden abpt ze Lambach vnd der gantz conwent da selben wir veriehen offenbar mit disen gegenbürtigen brief, daz wir mit wohlbedachten mvt vnd mit verainden rat daz gut ze Pfeffendorf gelegen ob des weges niden in dem dorffe mit allen den nvtzen di durch recht dar zu gehörnd ze holtz ze velde versucht vnd vnversucht, vorlichen haben ze rechten erybrecht Margrethen von Pfeffendorf vnd allen iren erben die sie mit irem wiert Chunraden von Pfeffendorf hat, der ez vor vnser im vnd seiner hawsfrowe die vorgenant ist vnd ir bayder erben ze einem erybrecht habend gewarben von dem seligen herren abpt Jansen dem Got genad also beschaidenlich, daz si vnserm gotzhaus jerichlich do von dienen sullen sechtzig newe wienner phenning an vnser vrowen tag ze der dienzeit in di chamer, vnd dreizzig wienner phenning ze powstewer, vnd zechen wienner phenning ze roytstewer vnd zway hoener vnd nicht mer. daz in daz stet gantz vnd vnzebrochen beleib, dar vber geben wir in disen brief versigelten mit vnsern auhangunden insigeln. Vnd ist daz geschehen do von Christs puert ergangen waren tausend jar drev hundert jar darnach in dem drev vnd fumftzigisten jar des nachsten svnntages nach dem heiligen ostertag.

Source Fulltext: OÖUB 7 (Wien 1876) S. 302, Nr. 297