Wir Vlreich von Gotes gnaden abpt ze Lambach vnd der gantz conventt daselben wir veriechen offenbar mit dem gegenbu^ertigen prief, daz fu^er vns cho^emen sind Fridel der Leytner vnd sein hausvrow Elspeth vnd Chv^enrad der Leytner bayd prueder vnd sein hausvrowe Elspeth vnd habend mit vnserm gu^etlichen willen vnd wart den hof datc Leyten mit allen den nu^etzen di durch recht dar zu^e geho^erend ze holtz ze veld versuecht vnd vnversuecht von vns geworben ze ainem erybrecht in vnd ir bayder erben di si mit ainander habend oder gewinnend mit solicher beschaidenhait, daz man jerichlichen dovon dyenen schol vnserm gotshaus in di Gustray sechs schilling newer wienner phenninge an vnsern vrawen tag ze der dyenzeit vnd sechtzig wienner phenning ze stewer an sand Mertains tag vnd sechs dyensthvener vnd ze ostern vnd ze pfingsten fumf schilling air vnd vier ches vmb acht phenninge, ze weinachten vier ches vmb acht phenning vnd fumf prot vmb zechen phenning, vnd sullen auch wir chain todrecht an si vodern. Darvber geben wir in den gegenbu^ertigen prief versigelten mit vnsern anhangunden jnsigeln, daz geschehen ist, do von Christs pu^erd ergangen waren tausend jar drev hundert jar darnah in dem sechs vnd fumftzigisten jar an sand Gallen tag.

Source Fulltext: OÖUB 7 (Wien 1876) S. 475, Nr. 468