Wir Jans von Gots gnaden abpt ze Lambach und der gantz convent daselbn wir verjechen, daz wir vorlichen haben dem beschaidenen mann Ollen von Altenhofen und seiner hawsfraw Magarethen. und ir baider erben den halben hof dalz Altenhofen auf dem Partze Gospoldshofer pfarre, ze ainem rechten eryb mit allen rechten und nutzen di durch recht darzue geho^erend ze holtz ze veld vorsuecht und unvorsuecht wie di genant sint also beschaidentlich, daz man unserm gotzhaus ierleich da von dyenen sol ain halb pfunt alter wienner pfenning und zwai huener an unser vrawen tag ze der dyenstzeit und drey schilling ze pawstewr an dem prechemtag und dreizzig pfenning ze voitstewr an sand Georgentag und nicht mehr. Daz in daz stet gantz und unzebrochen beleib daruber geben wir in den prief vorsigelten mit unsern anhangunden insigeln, daz geschehen ist nach Christus purd uber tausent jar drewhuntdert jar darnach in dem ain und sechtzigisten jar an gotsleichnam tage.

Source Fulltext: OÖUB 8 (Wien 1883) S. 21, Nr. 23