Ich Ann Hainreichs dez Schylher hawsfraw von Gnauzzendorf und ich Stephan ir sun wir verjehen, daz wir von dem erbern gotshaws ze Lambach ze leibgeding haben zu unsern tagen und nicht lenger vier jeuch akcher di gelegen sind auf dem Choboltz ze Gnauzzendorf ze nöst der herren von Lambach und der spitaler akcher, also weschaydenleich daz di egenanten herren von Lambach daz purchrecht von den egenanten akehern all iar dienen und raihen schullen den herren von Melyk an sand Cholmans tag an all unser mue. Und wann wir vorgenant zwen leib mit dem tod abgen und verschayden, so sind di vorgenanten vier jeuch akcher wi di dann erfunden werdent mit traid oder an traid, dem vorgenanten gotshaws ze Lambach gar und gantz ledig und frey an alle widerred, daz weder juden noch christen chain recht noch ansprach darauf haben schallen weder umb gelt noch umb chainerlay sach, an die perchherren umb ir purchrecht alain, den daz iarichleich gevallen schol. Und dez ze urchund geb wir dem offtgenantem gotshaws ze Lambach den offen prief versygelten mit der erbern mann iusygel Rupprechtz dez Gerestorffer die zeit veldrichter innerthalb dez Champs und Syghartz dez Praeuzzlein di zeit purkgraf ze Goboltzpurch di wir fleizzichleich dar umb gepeten haben ze zwain warn zeugen der sach in an schaden wann wir selb di zeit nicht aygner insygel gehabt haben. Der pref ist geben nach Christi gepurd uber dreutzehen hundert jar darnach in dem ainem und sechtzkistem jar dez suntags ze mitter vasten Letare.

Source Fulltext: OÖUB 8 (Wien 1883) S. 7f., Nr. 7