Ich Hans der Zauhinger und mein hawsfraw und mit sampt uns all unser erben wir vergechen, . . . daz wir . . . gesetzt haben Ortolfen dem Paussl und allen sein erben unser hub ze Chenning gelegen in Sirnikcher pfarr und lehen ist von unserm gnädigen herrn von Lonstorf ze Sinbelchirichen mit allen den rechten ern und nutzen und darzu gehörnt aus unser nutz und gwer in ir nutz und gwer mit recht lehen herren hant und mit aller stät, fur zehen phunt phenning wienner münzz der si uns gantz und gar veriecht und gewert habent, und scholl auch all jar losung sein an sand Chörigen tag, und schol auch ich vorgenanter Hans der Zauhing er des vorgenanten gutz ir gwer sein wo in des not geschiecht. Wer aver daz, daz dem vorgenanten Ortolfen dem Paussl und seinen erben an der gewerschaft oder an dem satz icht ab gieng mit recht, was si des schaden namen den ir ains gesprechen macht pey sein trewn an ayd ungesworen und an alles recht, den selben schaden mit sampt dem hauptgut schullen si haben auf uns und auf all unsrer hab wo wir di haben und in swelhen gericht di gelegen sey auf wasser oder auf lant versucht und unversucht. Und daz daz alles also stat und untzebrochen weleib von mir vorgenanten Hansen und von allen mein erben, daruber ze einem waren urchund gib ich dem vorgenanten Paussl und all sein erben den prief versigelt mit meinem anhangunden insigill, und ze einer pessern sicherhait und zeugnuzz mit des erbirdigen man Seybolz des Sintzendorfer anhangundem insigl im an schaden. Der prief ist gewen do man zalt von Christes gepurt dreuzehen hundert jar darnach in dem fümf und sechtzgistem jar an aller heyling abent.

Source Fulltext: OÖUB 8 (Wien 1883) S. 249f., Nr. 248