Wir graf Ulreich von Schawnberg verjehen fu^er uns all unser erben und nachkomen, daz wir angesehen haben die frewntlichen trew und lieb alz der andechtig in Got herr Ulreich appt ze Lambach der covent daselbst zu uns habent und hin fu^er gehaben mugent mit gaistlichen und weltlichen leuffen, wann auch wir betraht haben unser vorfardern unser und unsrer nachkomen sel hail, und haben demselben appt seinem gotzhaws und dem covent ze Lambach geben durch Gotes willen die guet alz si mit namen und worten hernach begriffen sind, dez ersten ain guet an dem Trawnbanch in Tesselprunner pfarr sehtzig phening geltz und ain guet ze Oberndorf in Swanser pharr sehtzig phening gelts, ain guet daselbst sehtzig phening gelts, ain guet datz Freintling in Atzpekcher pharr sehtzig phening gelts, ain guet datz O^edensnetzing sehtzig phening geltz, datz Gneisting in derselben pharr ain guet drey schilling sehs und zwaintzig phening gelts, das alles haben wir in geben lediklichen und freylich und aygen in daz mit allen eren rechten und nutzen und darzue gehörent, auzgenomen allain daz dieselben guet die schrann und das reht süchen sülln und die vogtei hinder ander herschaft nicht ziehen, daumb der obgenante appt all sein nachkomen und der covent ze Lambach alle jar jerleich ain jartag haben und begen süllent an sand Annen abent mit der vigili, und an sand Annen tag mit einem selampt daz der appt selb singen haben und handeln sol mit ganzer wirde und gaistlicher ordnung alz dartzue gehöret und billichen ist, und von den egenanten gueten sol den herren in das revent gevallen ain halb phunt wienner phening daz in der appt raichen und geben sol an sand Annen tag an alle irrung. Ez sol auch derselb jartag von dem appt und dem covent besorgt werden mit wahs mit licht und mit aller zuegehorung. Wer aber daz der appt und der covent ze Lambach daz also nit volfurtten alz vor geschriben stet, so habent sich die vorgenanten guet mit aller zuegehorung vervallen in unser aller unser erben und nachkomen gewalt an alle widerred krieg und ansprach, und sulln si daz mit nihte widersprechen weder mit gaistlichem noch weltlichem rehten wie daz jemant erdenchen oder erfinden mag an alles geverd. Mit urkund des briefs den wir darüber geben versigelten mit unserm insigel, geben ze Schawnberg an freitag vor sand Michels tag do man zalt von Kristi gepurd tausent drewhundert jar und darnach in dem sibentzigistem jare.

Source Fulltext: OÖUB 8 (Wien 1883) S. 487f., Nr. 492