Ich Chunrat der Etzlinger und mein hausfrow vrow Chunigund und all unser paider erben di wir haben oder noch gewinnen wir verjehen, daz wir versazt haben unser haus gelegen in dem purchfrid ze Lambach daz weilent des Czerer gewesen ist mit allen den rechten und nutzen di durch recht darzue gehörent, dem erbern herren Otten dem Owernhaimer czden czeiten chelner da selben, umb achtczehen phunt phening alter winner müns der wir von im gancz und gar gewert und gericht sein also mit der weschaiden, daz wir nicht lösen schullen von unser vrown tag cze dinczeit der schirst chumt uber zwai jar, darnach haben wir cze dem selben tag järleich lösung darauff vor virczehn tag oder nach virczehn tag. Wir sein auch des vorgenanten sacz auff dem haus sein recht geweren an aller stat wo imer des not und durfft geschicht nach rechtem lanz recht ob der Ens. Ging im an der gewerschafft icht ab wietan schaden er des nem den er mit sein ains trewen peweisen mag an als recht, den selben schaden schüllen wir im gancz und gar ab legen und schol er daz haben dacz uns und unsern trewen dar czu auff aller unser hab wo wir di lassen oder haben gelegen enhalb des Hansruk oder hinterhalb. Wir offen auch was an dem egenanten haus von rechten eehafften nötten cze pessern sei mit paw und czimer, daz schol er daran legen mit einer gewissen cwair erbern man, und was des sei daz schol er auff den egenanten satz und haus slahen und darauff haben mit samt den vorgeschriben achtzehen pfunt phening. Wer aver daz der vorgenant her Otto Owenhaimer abging mit dem tod da Gott lang vor sei, so maint er den satz auff dem haus ander niem denn dem erwürdigen gotzhaus ze Lambach da is purchrecht von ist, und dem selben gotzhaus oder seinem verweser wer der ist sei wir alles das punden und schuldig ze volfüren daz vor an dem briff geschriben stet. Daz im di red und auch dem gotzhaus also stat und unverchert peleib geben wir im den briff versigelten mit mein obgenanz Chunratz des Ezlinger anhangunden insigl, und ze einer waren und stäten urchunde mit meines lieben ohaim Hilprantz von Albrechtzhaim ze den zeiten vogt ze Wels und meines lieben swager Wernher des Paumgartinger paider anhangunden insigeln. daruber ze einer vestären sicherhait und stätigung verpint ich mich Lipp der Ezlinger darunder mit mein trewn für mich und all mein erben an aydes stat alles das staet und war ze halten daz vorgeschriben stet, wand ich aygens insigel nicht enhan. Der briff ist geben nach Christi purd da man zalt dreuzehnhundert jar und in dem sibentzigsten jar an sand Kylians tag.

Source Fulltext: OÖUB 8 (Wien 1883) S. 474f., Nr. 479