Ich Onoffer der Anhanger mein hausfraw und all unser erben wir verjechen, . . . daz wir unsern halben hof zu Obernswaig gelegen in Neunchircher pfarr der unser rechts erib gewesen ist von dem werdeigen goteshaus zu Lambach mit allen den eren nutzen und rechten di dar zu gehörent zu chauffen haben gegeben dem erwerdeigen geistleichen herrn abpt Ulrich und sein goteshaus daselbs umb ain gelt des wir von in gantz und gar gericht und gewert sein zu rechten taegen an schaden, und haben in den obgenanten halben hof in geantwort auz unser nutz und gewer in di irn. wir sein auch des vorgenanten halben hofs ir rechter gewer und fürstant für alle ansprach wo in des not geschicht nach lands recht ob der Enns. Ging in an der gewerschaft ichts ab mit dem rechten, daz schullen wir in uzraichten an all ire mü, taeten wir des nicht wyetan schaden si des nement daz des vorgeschriben goteshaus phleger oder wem er daz zu schafft an seiner stat mit seine trewen gesprechen mag ungesworn an recht, den selben schaden schullen wir in abtun und wider chern und schullen si das haben zu uns und auf aller unser hab wo wir di haben. Daz in di red also stet und unverchert beleib dar über gib ich vorgenanter Onoffer in den brief versigilten mit mein anhangunden insigil, und durch pezzer sycherhait mit meiner lieben brüder herrn Veyts und Jöchleins der Anhanger anhangunden insigiln. Gegeben nach Christi geburd dreitzehenhundert jar und dar nach in dem fünf und sybentzigstem jar an sand Valnteins tag.

Source Fulltext: OÖUB 8 (Wien 1883) S. 731f., Nr. 717