Ich Peter Pauzbekk und ich Luczey sein hausfrau wir verjechen offenbar mit dem gegenwürtigen prieff, daz wir mit wolbedachtem muet und mit aller unser erben guttleichem willen und wart verlihen haben unser gut auf der Reut mit allen den nutzen di durch recht dar zu gehörent, ze ainem rechten erib Hainreichen Tomleins sun ab der Reut und seiner hausfrau vrau Annen und allen ir paiden eriben also beschaidenleichen, daz man uns jerleichen davon dinen schol dreizzig phennig alt winner und zwai huener an unser fraun tag zu der dinstzeit und sechtzig wienner phening an sand Merteins tag und ches fur vir wienner phenning und pro^et fur vier wienner phening ze weinachten und dreizzig air und pro^et fu^er vier wienner phening ze ostern und anders nicht. Und als oft daz vorgenant gut verwandelt würt mit verchauffen oder mit versetzen, so schol man uns oder unsern eriben geben zwen und dreizzig wienner phening ze abvart und zwen und dreizzig wienner phening ze anlait. Wer aber daz der egenant Hainrich oder seine erben ab dem gut füren und liezzen ez einem anderm daz weder satz noch chauf hiez, daz selb schol geschehen an all ablait und anlait, und ze todrecht von dem selben gut schol man geben zwen und dreizzig winner phenning und nicht mer. Geschech aber daz ich vorgenanter Pauzbek oder mein erben daz gut verchauften oder versetzten mit den rechten und wir daran haben, des schullen di vorgenanten erben nindert enkelten an iren rechten. Wier offen auch ob uns der vorgenant dinst ze rechten tagen nicht gegeben würd gantz und gar, so schull wir und unsern erben albeg uber virtzehen tag darauf ze wandel haben zwen und sibentzig wienner phening als oft man uns den dinst versitzt. Daruber ich vorgenanter Peter Pauzbek gib den offen prieff versigelten mit meinen anhangunden insigel. Datum anno domini MCCCLXXV (millesimo trecentesimo septuagesimo quinto) in ascensione domini.

Source Fulltext: OÖUB 8 (Wien 1883) S. 761f., Nr. 739