Ich Ru^eger von Hvmbrechtzried ze den Zeiten richter ze Slierbach vnd mein Hauzzfraw vnd mit sampt Vns All vnser eriben, di wir haben, oder noch Chu^enftikchleich gewinnen, wie di genant sind. Vergehen vnd tvn chu^ent offenbar mit dem gegenbürtigen brief allen. den di den brief an sehent oder ho^ernt lesen, Daz wir mit wolbedachtem mu^et vnd mit gu^etleichem willen vnd wort Aller vnser eriben vnd nach vnserr nachsten vnd pestten vrewnt rat vnd haizzen, ze der zeit do wir daz wol getu^en mochten rechtt vnd redleich ze Chawffen haben geben vnsern hof genant ze Aychaym, gelegen in Lambekchaer pharr. vnd vnser Wis genant auf dem Slag gelegen in Gru^enacher pharr. di paydew vnser rechtt Lehen gewesen sind. von dem Erwirdigen Gotzhaws ze Lambach. Den selben Obgenanten Hoff vnd di Wis haben Wir chewfleich ze chauffen geben, Dem Erwirdigen geistleichen Herren Hern Vireichen di zeit Abpt ze Lambach. vnd dem Gotzhaws da selbs ze Lambach auz vnserr nutz vnd gwer in ir nu^etz vnd gwer mit allen den ern, nu^etzen vnd rechten, di dar zu geho^ernt vnd do von bechomen megen, ze holtz, ze Velld vnd ze Wismad oder wie sa daz genant ist, besu^echt vnd vnbesu^echt vnd alz der Obgnant Hoff vnd di Wis von alter her cho^emen ist, vmb ein gelt, dez wir gancz vnd gar von dem Obgnanten Gotzhaws gerichtt vnd gewert sein. An allen vnsern schaden. Wir schu^ellen. auch. dez voruerschriben chawffs dez Obgnanten Gotzhauzz recht gwern vnd fu^erstant sein, fu^er Allew Ansprach wo in dez not vnd durft geschiecht, also des Landes recht ist, Ob der Ens. Waer aber daz in an der gewerschaft icht ab gieng von wiettann sachen sich daz fuegt, daz den Obgenanten Chawf anru^ert, wiettann schaden si daran naemen. den selben schaden schu^ellen wir in ab tv^en vnd wider Chern, vnd schol. daz. daz Obgnant Gotzhaws haben vnd gewartend sein dacz vns vnd datz vnsern trewn vnd auf aller vnserr hab. wo wir di haben oder lazzen oder wie di gnant ist, besu^echt vnd vnbesu^echt. Daz di red also staet vnd vnuerchert beleib. Dar v^eber ze einem warn vnd staeten vrchu^end gib ich Obgenanter Ru^eger fu^er mich vnd all mein eriben dem obgnanten Gotzhaws den brief versiglten mit meinem anhangvndem Jnsigel vnd mit meins lieben Vetern Ludweigs von Humbrechtzried anhangvndem Jnsigel, vnd ze einer zewgnu^ezz mit meins lyeben O^ehayms kern Hannsen dez Chu^etzcho^efen anhangvndem Jnsigel di zeit Vogt ze Wels, vnd mit dez erbern ritter anhangvndem Jnsigel Hern Hannsen dez Glewzzaer di zeitphleger ze Schaernstain. di irew zwai Jnsigel. durich vnserr vleizzigen pet willen an den prief habent gelegt in vnd iren eriben an schaden. Der brief ist geben do man zalt von Christi gepu^ertt Drewtzehen hvndert jar, Darnach in dem Sechss vnd Simtzikgsten jar. dez Samtztags an sand Veytz Abent.

Source Fulltext: OÖUB 9 (Wien 1906) S. 85-86