Wir Virich von gotes gnaden Abpt ze Lambach vnd der gancz Conuent da selben, wir veriehen offenleich mit dem Gegenbu^ertigen prif vnd tun chund allen den di in sehent, ho^erent oder lesent, das wir mit wolbedachten mu^et vnd mit veraintem rat verlihen haben vnd cze Chauffen haben geben recht vnd redlich, czu^e ainem rechten erbrecht vnsern hofgenant in der praytenaw^e gelegen in widemspekcher pharr mit allen den nuzen vnd rechten, di durch recht dar czu^e geho/rent, cze holtz, cze veld, cze wismat, versu^echt oder vnuersu^echt, Nyclasen dem Aygner, seiner hausfrown vnd ir payder eriben, vmb ain gelt des wir von im gancz vnd gar gericht vnd gwert sein czu den rechten Tagen an schaden, Alzo beschaidenleich, das sew vns vnd vnserm Gotshaws Järlich von dem vorgenanten Hoff di^enen vnd raichen schöl ain phunt alter wyenner phenning an sand Michels tag vnd ain fu^eder Raifstangen, di^e wir mit vnserm hofwagen jarlich selber na^emen schullen au^ef dem egenanten hoff vnd gru^enten, di weilen vnd wir si vinten. dar au^ef, vnd nicht mer, schullen sew vns raichen noch geben in dem Jar. Wir offen auch, ab man vns den vorgenant dinst versaese vnd vns in cze den rechten Taegen nicht gaebe, So haben wir wollen gewalt sew cze phenten mit irem gu^etlichen willen, auf dem obgenanten Höff vnd grünten vmb vnsern vorgenanten dinst, vnd auch dar czu^e vmb dew wandel, nach des lands recht ob der Enns, wir schu^elen auch des obgenanten Höfs vnd dez erbrechcz dar au^ef i^er recht her und gwaer sein, wo^e in der no^et vnd durft geschit, alz erbrechtz recht ist nach lands recht ob der Enns. Vnd ging in aber an der gwaerschaft icht ab witain schaden si^e des na^emen, den schu^el wir in gancz vnd gar abelegen vnd wider chern vnd schuln sew das haben, dacz vns vnd dacz vnserm Gotshaus angeuaer. Das in das alles staet vnd vnezebrochen bleib, dar v^ebir geb wi^er in den prif versigelten mit vnsern anhangunden Jnsigel. Der geben ist nach Christi gepu^erd drevczehen hundert ia^er, dar nach in dem Sechs vnd Su^ebinczgsten ia^er an sand Johannes tag Sonnewenten.

Source Fulltext: OÖUB 9 (Wien 1906) S. 94-95