Wir Vlreich von gots gnaden Abt cze Lambach, vnd daz gancz Conuent da selbn veriehen offenlich mit dem pri^eff vnd tün chund allen den dy in sehent ho^erent oder lesent, daz wir mit wolbedachtem mu^et vnd mit veraintem rat recht vnd redlich verlihen haben ze ainem erib Vlreichen von Hu^enthaen seiner haüsvroü Katherey vnd iren eriben daz lehen ze Hu^enthaen ze nechst der Schachenhu^eb mit allen den nuczen vnd rechten, dy dar czu^e geho^erent cze holcz, ze veld, versu^echt oder vnuersu^echt, alzo beschaidenleich, daz man vns vnd vnserm goczhaüs ia^erlich da von di^enen vnd raichen schol, drey meczen waicz, ain meczen gersten, Sechs meczen habern, Sechs hv^enerr czer (!) dinst czeit, czwen chaes, di czwair phenning wert sein, vi^er phenning auf dew chaes, czwai mad phenning cze sand Michaels tag, czehen phenning cze weinfu^er an dem Prehen tag, fonifczig phenning cze paustewr, ain vaschang hu^en, cze sand Go^erigentage czehen phenning cze voytstewr vnd nicht mer vnuerczigen vnsers goczhu^es rechten, in allen sachen Wir offen auch, ab der vorgenante Vlreich von Hu^enthaen, Katherey sein hausfraw an eriben abgingen, so schulen acht phunt phenning au^es dem vorgenanten lehen erben auf V/elreichen von Pheffendorf vnd au^ef sein hausfraw vnd auf allew ir erben. Dar v^eber geb wir in den priff versigelten mit vnserm vnd vnsers Conuentz anhangunden Jnsigel, der geben ist nach Christi gepurd drewczehen hundert iar dar nach in dem newn vnd sübentzgesten iar an der heiligen jungvrou Dorothee tag.

Source Fulltext: OÖUB 9 (Wien 1906) S. 577-578