Jch Ru^eger von Starchenberch, der Ju^enger, vnd mein hawsfraw vnd allew vnser erben veriechen offenleich mit dem priff vnd tu^en chund allen den, dy^e in sehent, horent oder lesent, das wir mit wolbedachtem mu^ete vnd mit veraintem rat vnser pesten freund vnd mit gu^etlichem willen vnd wart aller vnser erben czu den czeiten, da wir es wol tu^en mochten, recht vnd redlichen cze chau^efen haben geben vnd verchauft haben vnser dryttail enehalben Trawn, vnd dishalben Trawn in den Varsten. die wir cze rechtem lehen haben gehabt von dem Gotshaws ze Lambach, dem erwirdigen gaestlichen ffu^ersten (sic) Abpt Vlreichen, Abpt ze Lambach vnd dem Gotshaws da selben vmb ain gelt, des wir gancz vnd gar von in gericht vnd gewert sein an allew vnser scheden, vnd haben in daz eingeantwurt au^ez vnser nucz vnd gewa^er in ir nucz vnd gewer, an allew ansprach, mit allen den nuczen, ern vnd rechten, alz es von alter her cho^emen ist, versu^echt vnd vnuersu^echt, wi^e dy^e genant sind, oder waz nucz da von cho^emen mu^egen. Wi^er schulen auch dez vorgenanten dryttails au^es den varsten i^er rechter fu^erstand vnd gewer sein, an stat, wo in des no^et vnd durft geschicht nach landes recht ob der Enss. Ging in aber an der gewerschaft icht ab, witain schaden si^e des nemen, den si^e gesprechen machten bey i^eren trewn an recht vnd vngesworn, den selben schaden, lob wir in ab cze legen vnd wider cze chern, vnd schuln si^e daz haben zu^e vns, cze vnsern trewn vnd da czu^e auf aller vnser habe, versu^echt vnd vnuersu^echt, wo wir dy^e haben au^ef wasser oder auf land. Daz in daz allez staet vnd vnczbrochen (!) bleib, dar v^eber geb wir in den pri^eff versigelten mit meins vorgenanten Ru^egern von Starchenberch aygem anhangunden Jnsigel, vnd cze ainer pessern sicherhait vnd czeugnu^ez mit meins lieben vettern hern Ru^egern von Starchenberch dez alten von Wiltperig anhangunden Jnsigel vnd mit meins lieben O^ehaim herrn Gundakchers dez Tanberger anhangunden Jnsigel, dy^e i^er Jnsigel durch vnser vleissigen pett willen an den prieff gehangen haben, in vnd all irn/e erben an schaeden. darvnder wir vns verpinden alles daz stoet cze haben, daz in dem pri^eff geschriben stet, der geben ist nach Christi gepu^erd drewczehen hundert iar dar nach in dem newn vnd su^ebinzgesten iar. an sand Mathias tag der da wirt vmb den vachang (!).

Source Fulltext: OÖUB 9 (Wien 1906) S. 582-583