Wir Ulreich von Gottes gnaden abbt ze Lambach und der gantz convent desselben chlosters vergehen und tun chunt offenbar mit dem brief allen den, die in sehent, horent oder lesent, daz wir mit wolbedachtem mut und veraintem rat recht und redleich verlihen haben zu ainem rechten erbrecht Hainreichen dem jungern, Niclasen dez alten Smalwiser sun und allen seinen erben unser hueb ze Weilspach niden an dem ort gelegen in Penewanger pharr mit allen den eren, nutzen und rechten die dartzu gehorent oder da von bechomen mugent, besucht und umbesucht, also beschaidenleich, daz sew uns alle jar jarleich da von dienen und raichen schullen an unser frawen tag ze der dientzeit drey schilling phenning alter Wienner munzz und zway huener, an sand Jorgen tag funftzehen phenning ze vogtstewr und nicht mer unverczigen unsers goczhaws rechten in allen sachen. Wir offen awch ob der obverschriben Hainreich abgieng mit dem tod an leib erben, so schol daz egemelt erbrecht erben auff den obgenanten Nicla den alten Smalwiser und sein erben. Daruber ze ainem waren steten urchund geben wir in den offen brief versigelt mit unsern anhangenden insigeln geben nach Christi gepurt dreuczehen hundert jar dar nach in dem drew und achtzicksten jar an sand Lucie tag der heiligen junchfrawen.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 378f, Nr. 327