Wir Ulreich von Gots genaden abtt ze Lambach und der gancz convent dez selben chlosters vergehen und tun chunt offenbar mit dem brief allen den er fur chumpt, daz fur uns chomen sind Kathrey und Elspet, Bernharts ab dem Voytsperig recht geswester, und habent mit wolbedachtem mut, mit willen und wart aller ir paider eriben recht und redleich ze chauffen geben ir paider tail dez guts auf dem Voytsperig gelegen pey dem Sultzpach in Puchler pharr mit alle dem, daz durich recht dar tzu gehort ze holcz, ze veld, versucht und unversucht, daz rechts eribrecht von uns und unserm gotshaus ist, dem benanten ir paider pruder Wernharten ab dem Voytsperig, seiner hawsvraw Petersen und ir paider eriben umb ain gelt, dez si gancz und gar ze rechten tagen und an schaden von in bericht und beczalt sind. Daz benant guet gancz mit aller seiner tzugehorung haben wir ze ainem rechten erib verlihen dem benanten Wernharten, seiner hawsvrawn Petersen und ir paider eriben in der beschaiden, daz man uns und unserm gotshaus jarleich davon dinen und raihen sol an unser vrawn tag ze der dinstzeit ain halbs phunt Wienner phennig alter munzz, zehen Wienner phennig ze vogtstewr und sechs huener und nicht mer. Wir offen auch, wer daz obgenant gut inne hat, der schol dhain wandlung damit haben, weder mit versetzen noch mit verchauffen noch mit dhainerlay weys an unser hannt und guten willen und schol allez daz da von leyden und dulden, daz ander unsers gotshaus eribler gein uns und unserm gotshaus leident und duldent und unverczigen unsers gotshaus rechten in allen sachen. Daz daz allez also stat und unverchert beleib geben wir den brif versigelten mit unsern anhangunden insigeln, der geben ist nach Christi gepurd dreuczehen hundert jar dar nach in dem newn und achtzigisten jar an sand Kathrein abent.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 400f, Nr. 343