Ich Rudolf die czeit pfarar cze Chinberg vergich offenleich mit dem brief vor mich und mein nachchomen, daz ich mich verpunden hab und auch wizzenleich verpind mit dem ge[gen]burtigen brief all jar jarichleich czu begen czwo haihczeit in dem jar zu der heyligen [dreifal]tickait in den acht tagen mit czwain ampten und mit ainer gesprochen mezz an obgenant[...] ainer gewonleicher mezz bey der pfarr und zu aller heyligen tag in den achtagen mit czw[ain] ampten und mit einer gesprochen messe an abgenomen einer gewonleicher mezz bey [der] pfarr und schol auch ich oder mein nach chomen albeg gedachnuzz haben Nicolaes dez Akleins und aller seiner vodarn und nachchomen, der do stiftar ist gewesen dez obgenanten g[...] dienst und hat awch mir und mein nachchamen auf mein tisch dar umb geschaffen [sechs] schilling pfennig gelcz auf dem akker gelegen cze Chinberg in dem purkchfrid under den [...] und ist gehaissen daz Unger feld, allso daz man mir von dem selbigen akher die sechs schil[ling] pfenng gelcz all jar jarichleich czu dem obgenanten czwayn hochczeiten czu iegleicher ho[ch]czeit mir oder mein nochchamen drey schilling pfennig auf mein tisch dien schol. [Wer] awer, daz ich obgenanter Ruedolf pfarrar ze Chinberg oder mein nachchomen die obgen[ant] czwo hochczeit nicht begieng und volpracht mit ampten und mit gesprochen m[essen] alz oben stet geschriben, so habent dez egenanten Nicolae nagst frewnt dez sollen ger[...] sich czu underbinden der sechs schilling pfenning gelts und dew allz lang ynn haben hincz [...] ich oder main nachchomen alz daz derfollen und erstaten daz versawmpt ist worden. Mit [ur]chunt dicz briefs versigelt mit meim aigen anhangunden insigel und czu einer pe[zern] czeugnuzz willen der sach, so hab ich gebeten den erbern Fridreichen den Chintaler, [daz] er sein insigel auch an den brief gehangen hat ym und allen sein erben an sch[aden]. Der brief ist geben nach Christes gewurd dreyczehen hundart jar und in dem [...] und achczigistem jar dez nagsten freitags nach allar heiligen tag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 401f, Nr. 344