Ich Peter Pawzwekk mein hawsfraw vnd all vnser eriben uergehen vnd tun chunt offenlich mit dem brief allen, den er für chumpt, daz für vns chomen ist Gundakcher von Erlach vnd hat mit wolbedachtem mut mit aller seiner eriben gutleichen willen vnd wart recht vnd redleich gemacht vnd geben seiner eleichen hausvrawn Agnesen Ortolfs tochter ab dem Haslach newn phunt wyenner phenig ze rechter morgengab nach dem landes recht ob der Enns auf seinem gut genant ze Erlach gelegen in Lambekcher pharr, daz sein rechts eribrecht von vns ist, vnd auf alle dem, daz durich recht vnd von alter dar czu gehört vnd dauon bechomen mag uersucht vnd vnuersucht. Daz haben wir auch der vorgenanten Agnesen ze einem rechten sacz uerlihen in solicher beschaiden, ob yemant herfur chäm, der pezzör erib dar czu wer, der hat järleich lösung auf dem obgenanten gut in den nagsten acht tagen uor Lichtmess oder hin nach in nagsten acht tagen vmb newn phunt wyenner phening vnd vmb nicht mer. Vnd auch in der beschaiden, daz man vns järleich von dem obgenanten gut dinen vnd raichen sol an vnser Frawentag ze der dinstzeit sechczig alter wyenner phening vnd uir huener, ze Weinachten sechczig wyenner phening vnd czben chäs, die acht phening wert sein, vnd prot für vir phening, ze Ostern czben chäs für acht phening sechczig ayr vnd nicht mer. Wer aber, daz vns di vodrung vnd der dinst uersezzen vnd nicht geraicht wurd ze den tagen, als uor gemelt ist, so sind vns allew irew recht gancz vnd gar ueruallen, also erbsrecht ist. Vnd welicher der eriben stirbet, so geuallent vns ein halbs phunt wyenner phening ze todrecht vnd anders nicht. Vnd dacz daz allez also stät gancz vnd vnuerchert beleib, gib ich obgenanter Peter Pawzbekk den offen brif versigelt mit meinem anhangundem insigel. Geben nach Christi gepurt drewczchen hundert jar darnach in dem drew vnd newnczigisten jar am Vreitag in der andern Vastwochen.

Source Fulltext: OÖUB 11 (Wien 1983) S. 161-162