Wir Ulreich von Gots genaden abpt ze Lambach vergehen und tun chunt offenbar mit dem brif allen den er furpracht wirt, daz fur uns chomen ist Benedict der Pendel und mit sampt im tzwen alt brif, di unser vordern seligen abpt Chunrat und abpt Hanns geben habent uber ein lechen gelegen ze Oberndorf in Puchler phar, also daz wir mit wolbedachtem mut mit dez vorgenanten Benedicten dez Pendleins und mit aller eriben gutleichen willen und wart recht und redleich auf den vorgenanten lechen und auf alle dem daz durich recht und von aller dar tzu gehort und da von bechomen mag, versucht und unversucht Hansen dem Jegersperger, seiner eleichen hawsfrawn Kathrein und allen ir paider eriben in rechtz satzs weys bestatt haben virtzehen phunt Wyenner phennig in solicher beschaiden, ob ymant herfur chem, der pezzor erib ze dem obgenanten lechen wer, der hat jerleich losung dar auf in den negsten acht tagen vor lichtmess oder hin nach in den negsten acht tagen umb virtzehen phunt Wyenner phennig und umb nicht mer. Wir offen auch, daz man uns und unserm gotzhaws jerleich da von dinen und raichen schol an unser frawn tag ze der dinstzeit sechczig alter Wyenner phennig und vir huner und an sand Gorigen tag fumf Wyenner phennig ze vogtstewr und nicht mer. Wir offen auch, wer daz obgenant lechen inne hat, der schol dhain wandlung da mit haben weder mit versetzen noch mit verchauffen noch mit dhainerlay weys an unser hant und guten willen, und schol auch allez daz da von leyden und dulden, daz ander unsers gotzhaws eribler gein uns und unserm gotzhaws leydent und duldent und unvertzigen unsers gotzhaws rechten in allen sachen, und daz daz allez also stet gantz und unverchert beleib, geben wir den offen brif versigelt mit unserm anhangundem insigel, der geben ist nach Christi gepurd drewtzehen hundert jar, dar nach in dem vir und newntzigisten jar an sand Jacobs tag.

Source Fulltext: StiAL, Kopialbücher, HS 17, P. Augustin Rabensteiner OSB: Documenta monasterii Lambacensis Bd. II, ab anno 1416-1443, S. 427f, Nr. 364