Ich Nycla der Schallenberger vnd ich Hartlieb vnd Andre die Herleinsperger an aim taill vnd ich Eberhart Mulbanger vnd ich Wolfhart Aschpan vnd ich Hanns der Waltpot an dem andern taill vergehen, daz wir all sechs mit einander veraintlich vber ain sein warden von alle der zuspruch wegen, die Friedreich der Mulbanger vnd sein hawsfraw Gut vnd Wolfgang der Schallenperger [vn]d Osann sein hawsfrawn gen einander gehabt habent von allez dez guts wegen, daz Wernhart der Nymmervol i[r] paider hawsfrawn vatter vnd ir sweher hinder im lazzen hat, in solher weschaiden, das wir von erst sprechen von dez geschäfts wegen, daz der Nymmervol säliger tan hat seinem obgenantem aydem Fridreich dem Mulbanger, daz sprich wir demselben Mulbanger gancz vnd gar ab, daz daz im noch seiner hawsfrawn chain chraft sol haben; auch spr[e]ch wir dem obgenanten Schallenberger vnd seiner hawsfrawn daz gut genant an dem Aygen gelegen in Veldkiricher pfarr, auch sprech[en w]ir im vnd seiner hawsfrawn das gut genant dacz dem Örhol in Newnkiricher pfarr, auch sprech wir im vnd seiner hawsfrawn, waz der Mulbanger vnd sein hawsfraw rechtens habent an dem ain gut ze Chell[...]off siezt, an dem nydern ortt vnd an dem gut ze Etangekk, daz sol auch dem Schallenberger vnd sei[nen ... er]ben geuallen. Auch sprechen wir dem Mulbanger vnd seiner hawsfrawn von erst alle die [...] der Nymmervol hinder im lazzen hat, vnd auch die zehent dacz Mulporcz in sand [...] auf dem gut dacz Katring vnd den zehent an der Leyten, die lehen sind von dem edlen herren [...] vnd auch die zway taill zehent an dem Weg dann vmb di virczik phundt pfennig, die der Mulbanger dem Nymmervol ist schuldig gewesen, darumb sprechen wir in vnd sein hawsfrawn vnd ir erben ledig vnd loz. Ez sol auch der obgenant Fridreich Mulbanger noch fraw Gut sein hawsfraw noch ir erben noch Wolfgang Schallenberger noch Asann sein hawsfraw vnd ir erben von allez dez guts wegen, daz ir obgenanter sweher saliger hinder im lazzen hat, chainen zuspruch noch vodrung gein einander nicht mer haben weder mit recht noch an recht in chainerlay weis vngeuerdleich. Ez sol auch yeder taill mit dem seinen allen seinen frum schaffen, wie in oder sein erben dez verlust. Vnd des zu vrchund geben wir obgenant sechs spruch man yedem taill den brief besigelten mit vnserm anhangunden insigeln, di wir der sach zu einer zewgnuzz an den brief gehangen haben, vns vnd allen vnsern erben an schaden. Der brief ist geben an nechsten Phincztag nach sand Cholmanntag, da man zalt von Christi gepurd drewczehenhundert jar vnd darnach in dem newnvndnewnczkisten jar.

Source Fulltext: OÖUB 11 (Wien 1983) S. 863-864