Ich Ulreich, die czeyt pfarrer zu Medlick, vergich und tu^en kunt offenleich mit dem brief allen den, die in sehen oder ho^eren lesen, die nu leben und her nach chu^enftig sint das ich mit gutem willen mitt wolbedachtem mu^et und czu der czeit, da ich es mit recht wol getu^en mocht willicleich gegeben und gewidemt hon, gib und widem auch wizzencleich mit dem brief mein mu^el, gelegen zu Potenstain czwischen dem marckt und der vest, und ist genant die Mittermu^el, die ich umb mein aygen varundhab gechaufft hab von der erbern frawen Kathrein, Gebhartes des Chu^ernbach seligen wytiben und von iren erben nach des chaufbriefs sag, den ich von yn dar u^eber hab, von der und von alle dew, das dar czue gehoeret; man dienet alle jar ja^erleich in die herschaft gen Potenstein sechs schilling Wienner pfenning fu^er ain swein, und sechczig pfenning von dem lochstampf an sand Michels tag und ainen mutt lawters rocken an der heiligen dreyr ku^enig tag zu rechten grund dienst und nicht mer. Die egenanten mu^el mitt aller irer zugeho^erung hab ich gegeben und gib auch mit dem brief uenser frawen pfarrkir[che]n zu Potenstein mit allen iren eren nu^eczen und rechten, als sy an mich komen ist, und ich sy in rechter gewer und an alle[n an]spru^ech her pracht hab also, das die ain czechmaiste[r, w]er der je die czeit ist, schol ynnen haben an stat der purger und der gemain, der schol da von begen alle jar jerleich und ewicleich zwen jarta^eg des ersten allen fu^ersten und fursti[nen] von O^esterreich und besunderleich dem edeln fu^ersten herczog Albrechten sa^eligen und seinen erben von des genaden ich der egenanten kirchen pfarrer gewesen pin, darnach mir, den mei[nen] und allen, den ich gutta^et gepunden pin, den ersten jartag an aller selen tag des abencz mit ainer vigili mit newn letzen und mit den laudibus, des na^echsten tags dar nach [mit] ainem gesungen selampt und darnach mit ainem ampt von unser frawen schi^edung und mit acht gesprochen selmessen u^ender den zwayen gesungen ampten, den andern [jarta]g an sand Philippes und Jacobs tag, des nachtes mit der vigili und des morgens mitt so vil messen in aller der weys als vor begriffen ist. Es schol auch ain czechmaister an j[ede]n jartag czu den czwayen ampten und des nachtes zu der vigili czehen stekchertzen auf stecken, die schu^ellen brinnen hincz das aller gotes dienst volbracht wirdet. Es schol au[ch ai]n priester u^ender dem ampt nach dem ewangelii auf sten und piten fu^er lebentig und fu^er tod, fu^er alle fu^ersten und fu^erstinn von O^esterreich gemaincleich und mit namen fu^er h[erczo]g Albrechten und herczog Lewpolten gepru^eder und fu^er alle ir erben, dar nach fu^er mich, meinen vater Ulreichen und fu^er mein muter Otylgen. Es schol auch ain czechmaister [die]n czwainzig priestern czu peden ta^egen das mal geben und ainem pfarrer zu jedem tag ein halbes pfunt ledigs geltes, darnach jedem gesellen zu jedem lag dreizzig pfenning [da]rumb, das sy fu^er die vorgenanten sel mit andern geleubigen selen alle suntag piten dem schulmaister und den czwayen cappla^en des isleichem zu jedem tag sechczehen pfenn[ing], den sechs fremden herren der iesleichem zu jedem tag czwelif pfenning, dem mesna^er zu jedem tag czwelif pfenning, dar umb, das er dreystund leu^ett, haws armen leuten [...] jedem tag sechczig pfenning; auch schol er alle jar vier armen menschen kauffen iesleichem fu^er ain halbes pfunt grabes pawren tuch. Ich wil und main auch, das die messe [auf] gotes leichnam altar, den ich new gepawet hab, alle pfincztag lo^ebleich gesungen werd czu der zeit und in aller der mass, als ich sy selber gesungen und angevenget hab; dar um[ben] schol ain czechmaister alle jar raichen und geben den czwayn gesellen, den czwagen kappla^en und ainem schulmaister der jerleichem drey schilling pfenning an sand Michels t[ag] und das alles payde fu^er chost und auch sust pringet acht pfunt pfenning und nicht mer und die u^ebrigen nu^etz die nach gemaynem lauff pilleich und mu^egleich sechczehen pfun[d p]ringen, die schol ain czechmaister ja^erleich der kirchen und der mu^el zu iren notdu^erfften an legen und die trewleich ein nemen und ausgeben. Er schol auch alle jar die nu^etz w[ide]rrayten vor ainem pfarrer und den purgern, wann die schu^ellen wizzen ob er der kirchen nu^etz sey oder nicht. Wer aber, das ain czechmaister die egenanten czwen jartag czu iren [rech]ten ta^egen nicht begieng, des ich je nicht main, und ob die purger das vor im liden, so schol sy ain pfarrer dar nach und das beiche^ach zu rede setzen und den jartag an sy vor[dern]. Te^aten sy dann seiner vorderung nicht genu^eck und liden die ain maneyd all czu hant dar nach, so ist die egenant mu^el mit aller irer czugeho^erung ainem pfarrer vervallen, der sch[ull si]ch ir dann uendercziehen an alle irrung und schol und mag die niezzen und nu^etzen als andrew der kirchen gu^eter, der schol danne die egenanten zwen jarta^eg und alles das als [vor] geschriben stet, trewleich und ge^anczleich ausrichten und volfu^eren ewicleich an all abczu^eg. Wer aber ain pfarrer seumick daran und ta^et dem egenanten gotes dienst nicht genu^eck [in] den vorbenanten ta^egen als von stuck zu stuck oben an dem brief wegriffen ist und widerta^et das nicht an ainem maneid, so ist dann die vorbenant mu^el mitt alle dew, das [dar]czu geho^eret des na^echsten [ta]ges dar nach ledig und loz worden dem erwirdigem gotzhaws czw Maurbach, die schu^ellen sich dan der egenanten mu^el u^enderwinden und ewicleich besitzen u[nd d]a von ausrichten in irem [kl]oster alles das, das oben verschriben ist, und schullen, das tu^en nach iren trewen als sy des pflichtig und gepunden sein zu tu^en darnach und sy got dar[umb] antwurten mu^essen. Und das die egenant mein stifft ewicleich sta^et und unczebrochen beleib, dar umb so gil ich den brief versigelten mit meinem aygen anhangunden insigel [un]d mitt des wirdigen herren maister Lienhartes des Schawr, die czeit offical zu Wienn, und mit der edeln hern Fridreichen von Walsse, die czeit lantmarischalk und hern Abern [des] Ottensteiner, die czeit hofrichter, und mit des erbern Hansen von Dietreichstock, die czeit forstmaister in O^esterreich anhangunden insigeln, die sy durch meiner vlaizzigen pet [wille]n an disen brief gehangen haben, und verpind auch ich mich dar under alles das stet zu haben, das oben an dem brief geschriben stet. Der brief ist gegeben, da man czalt nach [Chri]stes gepurd vierczehenhundert jar, dar nach in dem vierden jar an sand Jo^ergen tag des heiligen martyrer tag.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 537-540, Nr. 448