Wir Erasm von Gots gnaden abbt ze Lambach vergehen und tun kunt offenlich mit dem prieff allen den so er furchumbt, das fur uns chomen sind Fridel Hardecker am Stadel, Kathrey sein hausfraw ayns tails und Kathrey, Graswentzleins tochter am Stadel dez andern tails von der stoss, chrieg und misshelung wegen, so sie mit einander gehabt haben umb Abersehe und die Lacken mit aller irer zugehorung am Stadel gelegen im purkfrid, dar umb habent sie sich vor unser frewntleichen nach erberlewt rat bericht, betaidingt und beslicht also, daz dem obgenanten Fridreichen Hardecker, Kathrein seiner hausfrawn, und iren paiden erben gevallen und gesprochen ist die benant Abersehe mit seiner zugehorung, und davon er uns jarleich alle jar und unserm gotshaus raichen und dynen schol an sant Michels tag zehen Wyenner phenig und der obgenanten Graswentzleins tochter die obgenant Lacken und was dar zu gehort, gevallen ist, und dieselb benant Graswentzleins tochter verczeicht sich wissentleich und mitsampt ir erben mit dem prieff der benanten Abersehe mit aller seiner zugehorung, daz sie nach all ir erben nach nymands nicht von iren wegen hinfur da gegen nymer mer dhainen zuspruch nach anspruch haben sollen nach wellen wenig oder vil, weder mit recht noch an recht angever, unvertzigen und unengolten unser und unsers gotshaus vodrung und rechten, so wir auff der Abersehe und Lacken jarleich haben in allen sachen. Und dez ze urchund geben wir dem obgenanten Fridel Hardecker, Kathrey seiner hausfrawen, und iren paiden erben den prieff, versigelten mit unserm anhangunden insigel, nach Christi gepurt virtzehenhundert jar, dar nach in dem sechsten jar an sambstag vor Letare ze mitterfasten.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 572f, Nr. 474