Ich Erhart der Chornmezzer, purger zu Krembs und ich Elsbet sein hausfraw, und ich Michel, Erhartz Kornmezzer bruder, wir vergehen und tun kund offenlich mit dem brieff allen lewten, lembtigen und kunftigen, daz wir von dem ernwirdigen geistlichen herren abpt Erasm, abpt des klosters und gotzhauss zu Lamwach recht und redlich bestanden haben vir jeuch weingarten, minner ains virtails, die gelegen sind ze nachst der herren von Gersten ains tailn und an dem andern tail ze nachst des obgenanten herren von Lamwach weingarten in dem churczen Taillant niderthalb Krembs, dieselben obgenanten weingarten hat uns der vorgenant ernwirdiger geistlich herr und abpt dacz Lamwach verlazzen zu unsern obgenanten drin leiben und lebtagen und nicht lenger, und hat uns auch geurlaubt und gegunnet die obgenanten weingarten die stokch auz ze rawtten und akcher das auz ze machen in solicher maynung, daz wir in jarliech in irn hoff zu Krembs, genant Lambekcher hoff, einem yglichen irer hofmaister ainem daselbs da von raichen und dinen sullen von yedem jeuch zwen und dreizzikch Wienner pfenning an sand Merten tag und nicht mer. War awer, daz wir denselben dinst an sand Merten tag in irn obgenanten hoff nicht alle jar raichten odar dinten, so vervallent sich wandel darauff, alz auf ander versezzen dinst in dem lande zu Osterrich; war awer, daz wir in dinst und wandel ze lang verczugen, so habent sew vollen gewalt uns mit den nuczen ab denselben akchern darumb ze notten und ze pfentten alz lang uncz sy dinsts und wandel von uns gancz und jar gericht und gewert sein. Wir sullen auch die obgenanten akcher stiftlich und pawlich inne haben mit misten und mit allerlay aribayt alz akcher pawsrecht und gewonhayt ist in Osterrich; wir mugen auch unsrew rechten an der obgenanten akchern verchauffen oder verseczen, kristen und nicht juden, und auch mit irer gunst, willen und wizzen, und wann der lest leib under uns obgenante drin leiben mit dem tod abget, wie dann dieselben akcher dieselbicz zeit ligent, also sind sew dem obgenanten gotzhaws dacz Lamwach dann gancz und gar hin wider ledig warden und mugen sew dann allen irn frumb da mit schaffen, und daz die sach und die wandlung hin fur also gancz und unczebrochen beleib, so geben wir obgenante drey leib dem vorgenanten ernwirdigen geistlichen herren abpt Erasm dacz Lamwach den offenn brieff versigelten und bestett mit der erbern und weisen Symann des Tundorffer des rates zu Krembs, und Albrechten des Piber, yczund widemrichter daselbs paider anhangunden insigeln, in und irn erben an schaden, dar umb wir sew vleizzichlich gepeten haben, und dar under wir uns verpinden mit unsern trewn an aydes stat allez daz stet zu haben, daz vor allenthalben an dem brieff geschriben stet, der geben ist nach Kristi gepurd virczehen hundert jar und dar nach in dem sybenten jar an unser frawen abent in der vasten.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 592f, Nr. 487