Wir Erasm von Gots gnaden abbt ze Lambach und der gantz convent desselben klosters vergehen und tun kunt offenlich mit dem prieff allen den, so er furpracht und geczaigt wirt, das fur uns chomen sind Heinreich von Rath und Kunigund, Ortolffs tochter aws der Rewth, und haben mit wolbedachtem mut und veraintem rat, mit gunst und willen aller irr eriben und nagsten freunt, mit ganntzer stat recht und redleich verkaufft ze rechten kauff das ober lehen, genant an der Prantstat, gelegen in Lambecker pharr, das ir aller rechts eribrecht von unserm gotshaus gewesen ist, als sew uns des erweiset haben mit guter urchund daruber von unserm vorsidel abbt Greiffen saliger gedechtnuss, so sew gehabt habent, und auch uber die wisen ze Pawngarting und zu dem lehen gehort, und haben des benant lehen und wisen alles ze kauffen geben Chunraten dem Haberl, Kathrein seiner hausfrawen, Ulreichs von Hard tochter, die auch erib zu dem benanten lehen und wisen ist und allen iren paider eriben umb ein gelt, des sew gantz und gar von in verricht, gewert und beczalt sein ze rechten tagen an schaden. Also haben wir das egnant lehen und wisen den ytzund genanten Haberlein, Kathrein seiner hausfrawen und allen iren paiden eriben ze rechtem eribrecht verlihen und eingeantwurt in ir aller nutz und gewer mit allen eren, nutzzen und rechten, so von alter und durich recht darzu gehort und davon bechomen mag ze haws, ze hoff, ze hofmarich, ze holtz, ze veld, ze wismad, ze waid, versucht und unversucht, nichts ausgnomen in der beschaiden, das sew uns und unserm gotshaus jarleichen und alle jar von dem lehen, und gehort in unser ampt, das da haisset spital, an unser frawen tag ze der dinstzeit raichen und dynen sullen virtzigk newer Wienner phening, an prehentag zwaintzig Wienner phenig ze pawstewr, an sant Jorgen tag funff Wienner phening ze vogtstewr und sechs huner, und von der benanten wisen ze Pawngarting, und gehort in die abbtey, raichen und dynen sullen ze sant Jorgen tag zwaintzigk Wienner phening. Ez sind auch die benanten Heinreich von Rath und Kunigund, Ortolffs tochter auz der Rewth, des egnanten Haberleins, Kathrein seiner hausfrawen und ir aller paider eriben des lehen und wisen ze rechten kauff ir recht gewern und furstand fur all ansprach an aller stat, als offt in des mit recht, not und durfft geschiecht, also rechts kauffs nach des lannds recht ist ob der Enns. Wir offen, sew sullent dhainerlay wanndlung mit dem benanten lehen und wisen nicht haben weder mit versetzen noch mit verchauffen noch in ander dhainerlay weise an unser hannt und guten willen, und sullent auch alles das davon leiden und dulden gen uns und unserm gotshaus, das ander unsers gotshaus eribler gen uns leident und duldent unvertzigen aller ander unsers gotshaus rechten in allen sachen. Des alles ze urchund geben wir den prief versigelten mit unserm und unsers convents paider anhangunden insigeln, und beschehen ist nach Christi gepurt virtzehenhundert jar und darnach in dem czehendten jar an sant Agnesen tag der heiligen jungkfrawen.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 648-650, Nr. 523