Dem erwirdigen geistleichen herren herren Jacoben, abbt ze Lambach empieten wier Hans Spiczer, purger ze der Freinstat und ich Kathrey, sein hawsfraw, unser willig dienst. Gnediger herr, wier tun ewern gnaden ze wissen, daz wier unsern sun Erasm verheyrat haben zu der erbern frawen Kathreyn, Wernhartz dez Kamerer saligen tochter ze Lyncz und haben ir zu dem benanten unserm sun ze rechtem heyratguet nach dem landz recht in Osterreich ob der Enns geben und gemacht die hernach geschriben gueter und die von ew und ewerm gotshaws erb sind mit nam: den hoff ym Tal mit dreyen schilling pfenningen, und daz guet ze Hersing mit funff pfenningen, und nicht mer, und piten ewer gnad mit fleiss, ir wellet yn daz benant gemacht also bestaten mit ewerm prief noch lawt dez gemacht priefs, den wier yn daruber geben haben, daz wellen wier umb ewer gnad gern verdienn. Mit urchund dez priefs besigelt mit meinem dez obgenanten Hansen dez Spiczer auffgedruktem insigel. Geben am samstag noch unser frawen tag ze der Schiedung in dem czehen und vierczehenhundertisten jar.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 671, Nr. 538