Wir Jacob von Gots gnaden abbt ze Lambach vergehen und tun kunt offenlich mit dem prief allen den, so er furpracht und geczaigt wirt, das fur uns komen sind Hanns Spitzzer, purger ze der Freynstat, und fraw Kathrey sein hawsfraw, Chunraten des Gelbaitzzen saligen tochter, und habent mit wolbedachtem muet und veraintem rat, mit gutem willen und gunst aller irer paider erben und nagsten freunt mit unser hannt und mit gantzer stat recht und redleich gemacht und geben irer lieben snur frawen Kathrein, Wernharts des Chamerer ze Lintz saligen tochter, ze irer paider sun Erasm ze rechtem heyratgut nach dem lannds recht ob der Enns, das guet ze Heresing, gelegen in derselben pharr mit aller zugehorung, davon man uns und unserm gotshaus jarlichen und alle jar raicht und dient an sand Jorigen tag fumff Wienner phenig und nicht mer, und auch den hof mit aller zugehorung im Tal pey Pergarn, gelegen in Talhaymer pharr, davon man uns und unserm gotshaus auch jarleichen und alle jar raicht und dient an unser frawen tag ze der dinstzeit in dem heribst drey schilling newer Wienner phenig. Also haben wir die benanten zwai stuck guet und hof, die von unserm gotshaus recht eribrecht sind, der benanten frawen Kathrein, Erasms des Spitzzer hausfraw, ze rechtem heyratgut verlihen und eingeantwurt in ir nutzz und gewer mit allen eren, nutzzen und rechten, so von alter und durich recht darzu gehort und davon bechomen mag, nichts ausgnomen in solcher beschaiden, ob der egnant Erasm des benanten Spitzzer sun ee abgieng mit dem tod dann die benant sein hausfraw Kathrey, so schol sie die benanten stuck guet und hof innhaben ir lebtag und ir rechts leibgeding sein, und nach irem tod hinwider gevallen und eriben auf den benanten Hannsen Spitzzer, frawen Kathrein sein hausfraw und auf ir erben, da es dann pilleich und rechtlich hin eriben und gevallen schol. Wer aber, das sew mit einander leiberiben gewunnen und hinder in liessen, da pey sullen dann die benanten stuck, guet und hof, peleiben und dar auf eriben unvertzigen aller unsers gotshaus rechten in allen sachen. Des alles ze urchund geben wir den prief versigelt mit unserm anhangunden insigel nach Christi geburde viertzehenhundert jar und darnach in dem czehendten jar an mitichen vor sand Bartholomes tag des heiligen zwelifpoten.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 672f, Nr. 539